Policia e Shqipërisë ka finalizuar operacionin e koduar “Varkëtari”, duke arrestuar një 29-vjeçar nga Puka që dyshohet se po transportonte drogë, tritol dhe municion luftarak drejt Kosovës.
Sipas njoftimit zyrtar, i dyshuari L. P. kishte lëvizur me një varkë nga fshati Apripë i Pukës drejt Tropojës, ku më pas kishte parkuar një automjet tip Volkswagen me qëllim shmangien e kontrolleve policore.
Brenda bagazhit të makinës, Policia gjeti dhe sekuestroi:
1.2 kilogramë kanabis,
405 gram tritol,
51 kapsolla detonatore,
5 metra fitil zjarrpërcjellës,
municion luftarak,
si dhe një sasi parash.
Operacioni u realizua nga shërbimet e DVP Kukës, Policia e Tropojës dhe Forca e Posaçme “Shqiponja”, pas informacioneve operative se materiali do të kalonte në Kosovë.
I dyshuari u arrestua në flagrancë në fshatin Dushaj, ku u kap duke lëvizur me automjetin ku mbante të fshehur materialet e ndaluara.
Autoritetet shqiptare njoftojnë se po vijon bashkëpunimi me Prokurorinë dhe me homologët në Kosovë për dokumentimin e plotë të rastit dhe identifikimin e personit që pritej të merrte dërgesën në Kosovë.
Materialet janë proceduar për veprime të mëtejshme hetimore.
