Policia e Kosovës ka bërë një përpjekje që të ndalojë një veturë në fshatin Suhodoll në veri, por e njëjta nuk është ndalur dhe ka goditur një polic.
Zëvendësdrejtor i Policisë së Kosovës për rajonin e Mitrovicës Veri, Veton Elshani konfirmoi se rasti ka ndodhur rreth orës 12:40.
“Rreth orës 12 e 40 në Suhodoll derisa policia kishte bërë përpjekje për të ndaluar një veturë e cila dyshohej se kishte narkotik, i njëjti e ka godit me veturë policin i cili ishte në këmbë e po ashtu edhe veturën e policisë. Në përpjekje për të larguar sulmin nga vetja, policia ka shtënë me armë zjarri, por nuk ka të lënduar”, ka deklaruar ai.
Tutje, Elshani tha se personi i dyshimtë ka lënë veturën në vend të ngjarjes dhe ka ik në këmbë.
“Kemi informacione për të dyshimtin dhe besojmë se kemi të bëjmë me rast me marihuanë”, tha mes tjerash ai.
Policia ende është në vend të ngjarjes dhe po merret me rastin.
