Një gjuajtje me armë zjarri ka ndodhur mbrëmë në fshatin Shirokë të Suharekës, ku një 44-vjeçar ka mbetur i plagosur.
Sipas njoftimit të Policisë së Kosovës, i plagosuri është qëlluar në këmbë pas një mosmarrëveshjeje paraprake mes dy personave. Ai është dërguar fillimisht në Qendrën e Mjekësisë Familjare në Suharekë për ndihmë të parë dhe më pas në Spitalin Rajonal të Prizrenit. Pas një intervenimi kirurgjik, është liruar nga spitali, pasi lëndimet janë cilësuar si të lehta.
Me urdhër të prokurorit kujdestar, policia ka bastisur banesën e të dyshuarit 21-vjeçar me inicialet A.F., por ai nuk është gjetur në vendngjarje.
Aktualisht nuk dihet se çfarë arme është përdorur në rast, ndërsa hetimet për identifikimin dhe arrestimin e të dyshuarit po vazhdojnë nga Sektori i Hetimeve Rajonale.
