Pfizeri do ta shesë 110 deri në 130 dollarë një dozë të vaksinës së saj COVID-19 sapo qeveria amerikane të ndalojë blerjen e vaksinave.
Pavarësisht kësaj, prodhuesi i barnave thotë se pret që shumë njerëz të vazhdojnë ta marrin atë falas.
Drejtuesit e Pfizerit thanë se çmimi komercial për dozat e të rriturve mund të dalë në fillim të vitit të ardhshëm, në varësi të kohës kur qeveria të heqë dorë nga programi i saj për blerjen dhe shpërndarjen e injektimeve, raportoi Associated Press të shtunën.
Prodhuesi i barnave tha se pret që njerëzit me sigurim shëndetësor privat ose mbulim nëpërmjet programeve publike si Medicare ose Medicaid nuk do të paguajnë asgjë.
Një zëdhënës ka thënë se kompania ka gjithashtu një program ndihme të bazuar në të ardhura, që ndihmon banorët e kualifikuar të SHBA-së pa sigurim, të marrin dozat.
Çmimi do ta bënte vaksinën me dy doza më të shtrenjtën për klientët që paguajnë para në dorë sesa vaksinat vjetore të gripit. Ato mund të variojnë në çmim nga rreth 50 dollarë në 95 dollarë, në varësi të llojit, sipas CVS Health, e cila drejton një nga zinxhirët më të mëdhenj të farmacive në vend.
Një zyrtar i Pfizerit tha të enjten se çmimi reflekton kostot e rritura për kalimin në shishe me një dozë dhe shpërndarjen komerciale.
Prodhuesi i barnave tha vitin e kaluar se po paguante 19,50 dollarë amerikanë për dozë dhe se kishte tre nivele çmimesh globalisht, në varësi të situatës financiare të secilit vend.
Në qershor, kompania tha se Qeveria amerikane do të blinte 105 milionë doza shtesë në një marrëveshje që arrinte afërsisht 30 dollarë për dozë. Qeveria ka mundësinë të blejë më shumë doza pas kësaj.
Vaksina me dy doza e Pfizerit debutoi në fund të vitit 2020 dhe ka qenë vaksina më e përdorur për të luftuar COVID-19 në SHBA.
Më shumë se 375 milionë doza të vaksinës origjinale, të cilën Pfizeri e zhvilloi me prodhuesin gjerman të barnave BioNTech, janë shpërndarë në SHBA, sipas Qendrave për Kontrollin dhe Parandalimin e Sëmundjeve (CDC).
Vaksina solli 36.78 miliardë dollarë të ardhura vitin e kaluar për PfizerIin dhe ishte produkti më i shitur i prodhuesit të ilaçeve.
