Drejtori i Zyrës për Kosovë në Qeverinë e Serbisë, Petar Petkoviq, ka thënë se institucionet e Kosovës po përgatiten për t’iu shmangur detyrimit për formimin e Asociacionit të Komunave me shumicë Serbe.
Ai ka thënë se synimi i Prishtinës për të ikur nga bisedimet dhe procesi i formimit të Asociacionit është transparent, prandaj sipas tij, po përdoret vendosja e kushteve të pakuptimta dhe të pamundura, vetëm për të ikur nga obligimet që dalin nga dialogu në Bruksel.
“Beogradi as de fakto dhe as de jure nuk do ta njohë pavarësinë e të ashtuquajturës Kosovë, por formimi i Asociacionit është kusht për të gjitha kushtet për normalizimin e marrëdhënieve ndërmjet Beogradit dhe Prishtinës dhe parakusht për të gjitha hapat e mëtejshëm në atë drejtim. Prandaj Glauk Konjufca, i cili mezi e drejton Kuvendin e të ashtuquajturës Kosovë, nuk ka mandat të shkarkojë përbërjen e Ekipit Menaxhues Serb për hartimin e Statutit të Asociacion, kështu që më mirë të ikë nga puna sepse kjo përbërja e ekipit serb është konfirmuar nga autoritetet e tij ligjore”, ka thënë ai.
