Ka përfunduar protesta e dhjetëra studentëve të Universitetit të Prishtinës që u mbodhën para Bibliotekës Kombëtare këtë të mërkurë, për të kundërshtuar themelimin e Asociacionit të komunave me shumicë serbem raporton KosovaNews.
Ata janë nisur nga oborri i Bibliotekës drejt ndërtesës së Qeverisë.
Marshi është organizuar nga Parlamenti Studentor i Universitetit të Prishtinës, ndërsa janë bashkuar edhe disa qytetarë.
Në pankartat e marshit ata kanë shkruar “Bashkë kundër Asociacionit”, “S’pranoj Asociacion që nga bosnjëzon”, “Zajednica nuk kalon”, “Nuk falet toka që është ujitur me gjak”, “Gjaku i Dëshmorëve nuk falet”, etj.
“Serbia në raport me shqiptarët ka të kaluar kriminale. Bashkim vetëm me Shqipërinë jo ndarje as nënshtrim. Me trupat tanë me jetët tona do ta mbrojmë republikën tonë të ndërtuar me aq mund e gjak. Nga ky tubim ju bëjmë me dije autoriteteve vendore dhe ndërkombëtare se në nuk pranojmë themelim të Asociacionit”.
“Ky asociacion një etnik është në kundërshtim me Kushtetutën e Republikës sonë, ky asociacion nuk avancon te drejtat e serbeve por i instrumentalizon ata dhe avancon Serbinë ne Kosove, e si rrjedhoje e se cilës pashmangshëm krijohet destabilitet”, tha Albë Lala nga Parlamenti Studentor.
Megjithatë, marrëveshja e vitit 2015, mbi parimet për themelimin e Asociacionit, sipas Gjykatës Kushtetuese të Kosovës nuk është në harmoni të plotë me aktin më të lartë juridik të shtetit. Por, Kushtetuesja ka argumentuar se pikat mund të harmonizohen.
Qeveria e Kosovës, e udhëhequr nga Albin Kurti, e kundërshton formimin e një asociacioni njëetnik. Megjithatë, së fundmi, Kurti ka paraqitur gjashtë kushte për themelimin e Asociacionit, që sipas tij, do të mundësonte që një organ i tillë të formohej duke respektuar Kushtetutën dhe ligjet e Kosovës.
Por, Bashkimi Evropian dhe Shtetet e Bashkuara të Amerikës vazhdimisht kërkojnë nga Kosova që të themelojë Asociacionin./KosovaNews/
Lexo po ashtu:
