Një autobus është përfshirë nga zjarri në Qafë të Duhlës, në komunën e Suharekës.
Në vendin e ngjarjes kanë dalë njësitë e zjarrfikësve, të cilat kanë ndërhyrë menjëherë për të vënë zjarrin nën kontroll dhe për të parandaluar përhapjen e tij të mëtejshme.
Policia e Kosovës ka bërë të ditur se nga ky incident nuk ka persona të lënduar.
“Rreth orës 16:16, është raportuar se në fshatin Duhel të Suharekës një autobus ka marrë flakë gjatë lëvizjes. Menjëherë pas pranimit të informacionit, njësitë policore dhe zjarrfikësit kanë dalë në vendngjarje. Zjarri është lokalizuar dhe shuar me sukses. Sipas të dhënave fillestare, si pasojë e zjarrit janë shkaktuar vetëm dëme materiale, ndërsa nuk raportohet për persona të lënduar. Rasti është duke u hetuar nga njësitë përkatëse policore me qëllim të përcaktimit të shkaqeve”, thuhet në njoftimin e Policisë Rajonale të Prizrenit.
