Papa Françesku shprehu keqardhje për “situatën e dëshpëruar humanitare” për palestinezët në Gazë dhe bëri thirrje për një armëpushim të menjëhershëm dhe lirimin e pengjeve, në mesazhin e tij të Krishtlindjes më 25 dhjetor.
“Zemra ime pikëllon për viktimat e sulmit të neveritshëm të 7 tetorit dhe përsëris apelin tim urgjent për çlirimin e atyre që ende mbahen peng”, tha 86-vjeçari, në mesazhin e tij të përvitshëm për Krishtlindje.
“Unë bëj thirrje që t’u jepet fund operacioneve ushtarake me të korrat e tyre të tmerrshme të viktimave të pafajshme civile dhe bëj thirrje për një zgjidhje të situatës së dëshpëruar humanitare duke lejuar furnizimin e ndihmave humanitare”, u tha ai mijëra besimtarëve të mbledhur në Bazilikën e Shën Pjetrit në Vatikan.
Papa bëri thirrje gjithashtu për zgjidhjen e konfliktit izraelito-palestinez “përmes dialogut të sinqertë dhe këmbëngulës midis palëve, të mbështetur nga vullneti i fortë politik dhe mbështetja e komunitetit ndërkombëtar”.
Gati tre muaj pas fillimit të luftës midis Izraelit dhe Hamasit – grupit të shpallur organizatë terroriste nga SHBA-ja dhe BE-ja – situata humanitare në Rripin e Gazës është “një katastrofë” sipas Kombeve të Bashkuara, me 85 për qind të popullsisë të zhvendosur.
Lufta filloi më 7 tetor kur persona të armatosur të Hamasit depërtuan kufirin e militarizuar të Gazës dhe vranë rreth 1.140 njerëz në Izrael, kryesisht civilë, sipas një raporti të AFP-së bazuar në shifrat izraelite.
Militantët palestinezë rrëmbyen gjithashtu rreth 250 persona, 129 prej të cilëve mbeten në Gaza, sipas autoriteteve izraelite.
Duke u zotuar se do ta shkatërronte Hamasin, Izraeli filloi një bombardim dhe pushtim tokësor të Gazës, ku 20.424 njerëz janë vrarë, kryesisht gra dhe fëmijë, sipas numrit të fundit nga Ministria e Shëndetësisë e territorit të drejtuar nga Hamasi.
Izraeli kontrollon hyrjen në Gazë dhe një sasi e ndihmave ka hyrë përmes Egjiptit. Javën e kaluar, Izraeli miratoi dërgimin e ndihmave përmes vendkalimit Kerem Shalom, por sasia është e pamjaftueshme për t’i përmbushur nevojat në territorin e shkatërruar.
“Paqe për Ukrainën”
Kreu i katolikëve në fjalimin e tij foli gjithashtu për konfliktet në Siri, Liban dhe Jemen duke thënë se ai lutej “që së shpejti të arrihet stabiliteti politik dhe social”.
Papa Françesku tha gjithashtu se ai kërkon “paqe për Ukrainën”, e cila po feston Krishtlindjet më 25 dhjetor për herë të parë, duke shpërfillur datën tradicionale ortodokse të 7 janarit të kremtuar në Rusi.
“Le ta ripërtërijmë afërsinë tonë shpirtërore dhe njerëzore me njerëzit e saj të përvuajtur, në mënyrë që me mbështetjen e secilit prej nesh, ata ta ndjejnë realitetin konkret të dashurisë së Zotit”, tha ai.
Papa kërkoi gjithashtu paqe midis Armenisë dhe Azerbajxhanit, të cilat kanë qenë të bllokuara në një konflikt territorial për dekada, ndërsa përmendi edhe “konfliktet që shqetësojnë rajonin e Sahelit, Bririt të Afrikës dhe Sudanit, si dhe Kamerunin, Republikën Demokratike të Kongos dhe Sudanin e Jugut”.
Ai tha se shpresonte se tensionet në gadishullin korean do të zgjidheshin “duke ndërmarrë procese të dialogut dhe pajtimit të aftë për të krijuar kushte për paqe të qëndrueshme”.
Papa argjentinas rezervoi fjalët e tij të fundit për kontinentin amerikan, duke u bërë thirrje “njerëzve të vullnetit të mirë” të “shpikin mënyra të përshtatshme për t’i zgjidhur konfliktet sociale dhe politike, për t’i luftuar format e varfërisë që cenojnë dinjitetin e njerëzve, për ta reduktuar pabarazinë dhe për ta trajtuar fenomenin shqetësues të migrimit”.
