Shefi i Grupit Parlamentar të PDK-së, Abelard Tahiri, ka thënë se Qeveria i ikën debatit për skandalet në vend, duke përmendur Serbinë.
Ai ka thënë se skandalet e kësaj qeverie janë aq të mëdha “sa nuk di nga t’ia fillosh”.
Tahiri ka thënë se do të propozojë krijimin e një komisioni hetimor për t’i hetuar dëmet që ka shkaktuar zjarri i fundit në IML.
“A të flitet për Gani Jakupin, apo për sulmet që ndodhin ditën me armë të gjata, për djegien e IML-së apo për dështimin e popullsisë të cilin Qeveria e dështoi qëllimshëm veç për të mos e treguar numrin e saktë të qytetarëve për shkak të shifrave të migrimit”, ka thënë ai.
Tahiri ka thënë se që prej ardhjes së Lëvizjes Vetëvendosje në pushtet janë parë përpjekje të vazhdueshme për ta penguar punën e Institutit të Mjekësisë Ligjore.
“U ballafaquam me humbjen e mostrave të rastit Dehari. Do t’i propozojmë Kuvendit një komision hetimor që do të hetojë dëmet që ka shkaktuar zjarri i fundit në IML. Ky komision do të hetojë edhe humbjen e mostrave të rastit Dehari. Javën që vjen do të propozojmë në këtë seancë themelimin e këtij Komisioni. Qytetarët e meritojnë ta dinë se çfarë ka ndodhur në të vërtetë ku janë mostrat e çka është dëmtuar nga zjarri”, ka thënë ai.
