Lëvizja Vetëvendosje, Partia Guxo dhe disa asamblistë të minoriteteve, të premten kanë bojkotuar seancën e Kuvendit të Prizrenit duke e lëshuar sallën në mënyrë kolektive, raporton KosovaNews.
Kjo pasi që me kërkesën e Lidhjes Demokratike të Kosovës dhe përkrahjen e PDK-së në pushtet, nga rendi i ditës u hoq pika “Pyetjet e kuvendarëve dhe ngritja e çështjeve të ndryshme”,
Menjëherë pas lëshimit të sallës, asamblistët e LVV-së dhe ai i Partisë Guxo, kanë shpërthyer me reagime të ashpra në rrjete sociale duke thënë se me heqjen e kësaj pike, po u pamundësohet paraqitja e kritikave dhe adresimi i problemeve të qytetarëve të Prizrenit.
Asamblistja e LVV-së, Dafina Alishani ka thënë se ta heqësh pikën “Pyetjet e këshilltarëve komunal” nga rendi i ditës është e papranueshme dhe kundër demokracisë dhe kundër komponentëve bazë të qeverisjes së mirë.
Tutje tha se kjo qeverisje nuk po e sheh të arsyeshme t’i dëgjoj kërkesat e qytetarëve të cilat vijnë përmes këshilltarëve komunal.
Ndërkaq, asamblisti i LVV-së, Selman Sokoli ka deklaruar se PDK që i zgjidhë ‘problemet’ pa konkuru, nuk mendon që qytetarët kanë të drejtë të ngritin çështje të qytetarëve në Kuvendin Komunal, në vendin ku ata përfaqësohen përmes përmes përfaqësuesve të zgjedhur.
“Krejt kjo me ndihmën e LDK-së së Driton Selmanajt i cili erdhi në krye të kësaj partie në Prizren me idenë e të bërit opozitë, por si zakonisht, patericë e PDK-së”, tha ndër të tjerash Sokoli.
Edhe asamblisti, Islam Thaçi u shpreh se largimi i pikës të vetme ku mund të dëgjohen shqetësimet e qytetarëve është shenjë e keqe për pozitën por dega e LDK-së sipas tij duhet të analizojë pozitën karshi qytetarëve që i përfaqëson
Nga ana tjetër, asamblisti i Partisë Guxo, Petrit Hoxhaj, ka reaguar duke thënë se sot pytjet e kuvendarëve ndaj ekzekutivit, janë mjet drejtpërdrejtë për t’ua mbyllur gojën kuvendarëve për hallet dhe problemet e qytetarëve.
