Kuvendi i Kosovës ka miratuar Planin hapësinor për parkun kombëtar “Bjeshkët e Nemuna”. Për këtë plan kanë votuar 65 deputetë dhe kanë abstenuar 8 të tjerë
Në vazhdimin e seancës që është duke u mbajtur sot, ky Plan është mbështetur nga deputetët e partisë në pushtet, Lëvizjes Vetëvendosje, por është kundërshtuar nga opozita.
Shefi i Grupit Parlamentar të Partisë Demokratike të Kosovës (PDK), Abelard Tahiri, ka thënë se si parti do të përmbahen nga votimi.
“Si Grup Parlamentar i PDK-së konsiderojmë që Ministria ka bërë një punë të mirë por kemi marrë vërejtje dhe ankesa nga banorët dhe si GP do të përmbahemi sot nga votimi. Do të ishte mirë që të bëhet kthimi prapa i këtij plani dhe të hyhet në një diskutim më thelbësor për ti diskutuar vërejtjet e banorëve. Kësisoj ne nuk do të marrim pjesë në votim”, ka theksuar Thairi.
Kurse deputeti i Lidhjes Demokratike të Kosovës, Besian Mustafa, ka folur lidhur me kërkesat e banorëve të asaj pjese.
“Qytetarët nuk pranojnë të vendosin kurrfarë laure. Kanë kërkuar që pronat private të largohen nga parku kombëtar. Kanë kërkuar tu njihet e drejta e legalizimit të objekteve të ndërtuara sipas planit hapësinor”, ka theksuar Mustafa.
Kritika për Planin ka pasur edhe deputeti i Aleancës për Ardhmërinë e Kosovës, Shemsedin Dreshaj.
Sipas tij. ky draft ka shumë pasaktësi dhe është i përditësuar.
Ndërkohë që nuk ka kaluar Propozim-rezoluta për gjendjen në Ministrinë e Industrisë, Ndërmarrësisë dhe Tregtisë, debati për të cilën ka përfunduar në njërën nga seancat e kaluara.
Në fakt Kuvendi nuk e ka miratuar rezolutën e Partisë Demokratike të Kosovës përmes së cilës, ndër të tjera kërkohet shkarkimi i ministres së Industrisë, Ndërmarrësisë dhe Tregtisë, Rozeta Hajdari.
Kjo rezolutë i ka marrë 26 vota për, 60 kundër dhe asnjë abstenim.
Votimi i kësaj rezolute ishte shtyrë për sot, për shkak se në seancën e mbajtur me 25 maj nuk kishte numër të mjaftueshëm të deputetëve për ta hedhur këtë pikë në votim.
Tani deputetët janë duke votuar për zgjedhjen e një anëtari të Bordit për Ankesa të Mediave.