E ngarkuara me punë e Ambasadës së Shteteve të Bashkuara të Amerikës në Kosovë, znj. Anu Prattipati, zhvilloi këtë javë takime me udhëheqësit e tri partive kryesore opozitare në vend: Partisë Demokratike të Kosovës (PDK), Aleancës për Ardhmërinë e Kosovës (AAK) dhe Lidhjes Demokratike të Kosovës (LDK).
Në njoftimin e Ambasadës Amerikane thuhet se gjatë këtyre takimeve, znj. Prattipati theksoi një nga parimet themelore të demokracisë – e drejta e çdo qytetari për të votuar për përfaqësuesit e vet. Ajo shprehu shqetësim për çdo përpjekje që, përmes taktikave politike apo procedurale, mund të bllokojë pjesëmarrjen e partive të kualifikuara në procesin zgjedhor, duke theksuar se kjo dëmton seriozisht sistemin demokratik të vendit.
Në bisedimet me liderët politikë, u trajtua edhe çështja e ngërçit aktual në formimin e qeverisë së re. Znj. Prattipati u bëri thirrje udhëheqësve që të marrin përgjegjësinë që u është dhënë nga qytetarët e Kosovës dhe të punojnë së bashku për të gjetur zgjidhje efektive për sfidat me të cilat po përballet vendi.
“Udhëheqësit e Kosovës janë zgjedhur për të zgjidhur sfidat e qytetarëve të tyre. Ata duhet të bashkëpunojnë për të përmbushur mandatin që u është dhënë nga populli”, theksoi ajo.
Ky mesazh vjen në një periudhë të ndjeshme politike për vendin, ku bashkëpunimi ndërpartiak shihet si kyç për stabilitetin institucional dhe funksionimin demokratik të Kosovës.
