Ish kandidati për deputet i Lidhjes Demokratike të Kosovës, Shkëmb Manaj, pas një kohe të gjatë heshtjeje ka reaguar nëpërmjet një statusi në facebook duke thënë se mënyra se si ka dal komunikimi i brendshëm i LDK-së në publik, është e ulët.
Sipas tij, kjo ka ndodhur për ta dobësuar pozicionin e LDK-së në raport me marrëveshjet eventuale për bashkëqeverisjes dhe për të “tentuar të shantazhojnë LDK-në”.
“Ajo është pjesë e një fushate të individëve që çështjet e tilla të debatit të brendshëm, dëshirojnë t’i bëjnë kauza politike për ta goditur shtëpinë tonë politike, në kohën kur ajo ka filluar të ringritet! Gjithashtu për ta dobësuar pozicionin e LDK-së në raport me marrëveshjet eventuale për bashkëqeverisjes dhe për të tentuar të shantazhojnë LDK-në, por kanë harruar se sot dhe asnjëherë LDK nuk mund të shantazhohet. Sot, ne duhet të jemi të përbashkuar për shumë arsye dhe për procesin e radhës zgjedhor, të zgjedhjeve lokale”- ka thënë ai.
Manaj, i cili para pak ditëve mori postin e nënkryetarit të Prishtinës, e mohoi se ky vendim u mor nga partia e tij për “mbyllje goje”.
“Thanë se me është mbyllur goja për pozicionin e nënkryetarit të Kryeqytetit. Ju them, se asnjë lidhje ky pozicion nuk e ka me këtë proces dhe për këtë janë në dijeni udhëheqësia e LDK-së dhe Kryetari i Kryeqytetit. Me është kërkuar nga ta që marr këtë përgjegjësi për shkak të angazhimit tim tash e mbi tri vite në Kryeqytet, me qëllim të ruajtjës së vazhdimësisë të proceseve, tash në fund të këtij mandati të parë qeverisës në Prishtinë”- ka shkruar Manaj.
Ai tutje ka thënë se ata që kanë dashur ta godasin LDK-në dhe lidershipin e saj përmes tij, kanë dështuar. Manaj ka thënë se për sa i përket vërejtjeve personale për procesin e votimit me postë, të gjithë komunikimin e ka bërë brenda strukturave dhe asnjëherë nuk ka dal në publik.
“Fillimisht e kam njoftuar Kryetarin e LDK-së! Pastaj, në grupin e Kryesisë kam reaguar i fundit, edhepse veç unë kam qenë në atë grup që e kam humbur mandatin e fituar nga ky proces i votave me postë. Kështu jam i edukuar unë, që ta ruaj shtëpinë time politike, edhe atëherë, kur me merret një e drejtë e fituar!” – është shprehur ai.
Ndërkohë edhe Kryetari i Lidhjes Demokratike të Kosovës, Lumir Abdxhiku, ka reaguar pas publikimit të mesazheve në “Viber” mes anëtarëve të Kryesisë së LDK-së, ku flitet për manipulimin me vota.Në komunikimet e publikuara nga Reporteri.net, janë mesazhet e Kujtim Shalës, Arben Gashit, Armend Zemajt dhe Avdullah Hotit.Gashi në komunikimin e publikuar nga ky portal këmbëngul se ka pasur vjedhje të votave dhe insiston që skemës, që sipas tij, u orkestrua nga disa bashkëpartiakë, t’i vihet emri “skemë kriminale”.
