Pas zjarrit të madh që shpërtheu në ishullin e Rodosit, që detyroi evakuimin e 19 000 turistëve, edhe në Korfuz kanë shpërthyer flakët.
Korfuzi është kthyer në ishullin e fundit grek që ka lëshuar urdhër për evakuim, teksa Greqia po përballet me zjarre pyjore.
Në pamjet e publikuara nga mediat shqiptare flakët që kanë përfshirë ishullin shihen edhe nga Shqipëria.
Urdhri në këtë ishull vjen pasi rreth 19.000 persona janë evakuuar nga ishulli tjetër grek Rodos, që është përfshirë, po ashtu, nga zjarret.
Shumë persona janë detyruar të ikin nga hotelet, pasi zjarret kanë vazhduar të përhapen nga qendra e ishullit grek.
Greqia ka regjistruar ditëve të fundit temperaturë mbi 40 gradë Celsius dhe për pasojë në disa zona janë përhapur zjarret.
Presidenca greke ka thënë se plani që e hëna të shpallet festë kombëtare, tani është anuluar, si pasojë e “kushteve të jashtëzakonshme në shtet, për shkak të zjarreve”.
Korfuzi – që gjendet në Detin Jon, në veriperëndim të Greqisë – është destinacion i vizituar shumë nga turistët, kryesisht ata britanikë.
.
