Gjykata e Prizrenit të mërkuren i ka caktuar masën e paraburgimit prej 30 ditësh për katër të arrestuarit, përfshirë kolonelin e Policisë, Nexhmi Krasniqi.
Caktimi i masës së paraburgimit për katër të arrestuarit më 04.08.2025 në një aksion të gjerë të Inspektoratit Policor të Kosovës, Policisë në koordinim edhe me Prokurorinë e Prizrenit.
Sipas burimeve të KosovaNeës brenda sistemit të drejtësisë koloneli Nexhmi Krasniqi për shkaqe sigurie është dërguar në Burgun e Sigurisë së Lartë në Dyz të Podujevës.
Nexhmi Krasniqi, Liman Sallauka, Xhevat Sallauka dhe Ramadan Paçarizi, u arrestuan më 4 gusht 2025 me urdhër të Prokurorisë së Prizrenit nën dyshimin për shmangie nga tatimi, detyrim dhe armëmbajtje pa leje.
Ish Drejtori i Policisë së Prizrenit , Nexhmi Krasniqi, po dyshohet për dy vepra penale, atë të detyrimit dhe të armëmbajtjes pa leje.
Në këtë rast, Prokuroria ka bërë ngrirjen e xhirollogarive në vlerë prej 126 mijë e 997 eurove, ka sekuestruar të holla “cash” gjatë bastisjes në vlerë prej 8 mijë e 850 euro, dhe ka ngrirë një pronë me sipërfaqe të përgjithshme prej 58,7 ari.
Po ashtu, gjatë bastisjes janë sekuestruar edhe dy pistoleta, 50 fishekë 9 milimetër Lauger, 13 fishekë 9 milimetër me mbishkrim të PK, dy pushkë ajrore dhe një elektroshok, gjashtë telefona mobilë, fletore, aktvendime, autorizime, ekstrakte, kontrata dhe dokumentacion të ndryshëm, që do të shërbejnë në cilësi të provave materiale.
Koloneli policor Nexhmi Krasniqi bashkë me tre të dyshuarit e tjerë po pretendohet se kanë funksionuar si një grup i organizuar. Të njëjtit në një periudhë kohore nëntor- dhjetor 2024 në Prizren dyshohen se kanë detyruar një person- E.M. që një parcelë që me çmimin e tregut kushtonte 400-500 mijë euro ta shiste në vlerë të 250 mijë euro që konsiderohet nën çmimin e tregut.
Këtë ngjarje dyshohet se katër të arrestuarit, përfshirë edhe kolonelin policor, e kishin realizuar duke përdorur edhe kërcënime serioze në drejtim të viktimës.
Në dosjen e prokurorisë thuhet se dy vëllezërit Sallauka, Krasniqi, bashkë edhe me Paçarizin pasi kishin dijeni se i dëmtuari kishte pjesë në pronësi të një ngastre/parcelë i kishin kërkuar në vazhdimësi që të takohen dhe në fund e bindin që të tërhiqet nga ajo ngastër në Lubizhdë e që kjo situatë më pas binte në dobi të Ramadan Paçarizit, i cili e kishte blerë parcelën nën çmimin e tregut për 250 mijë euro, pronë kjo që realisht kishte çmimin në vlerë prej 400 mijë deri në 500 mijë euro.
Tutje dosja përshkruan se i dëmtuari në këtë rast dyshohet se bashkë me Liman Sallaukën kishin shkuar në shtëpinë e kolonelit policor Nexhmi Krasniqi dhe nga të hollat që ishin marrë prej Ramadan Paçarizit i kishin dhënë kolonelit 10 mijë euro “cash” në një zarf ndërsa 20 mijë eurot e tjera ishin për dy vëllezërit Sallauka.
