Në kuadër të planit operacional të Task Forcës, në zonën kufitare “Lindje”, Policia e Kosovës në dy raste të ndara ka bërë parandalimin e kontrabandimit me mallra.
Në njoftimin e Policisë, thuhet se sot pak pas mesnate malli u tentua të kontrabandohej përmes dy veturave me targa të Serbisë.
“Me datën 27.06.2023 rreth orës 00:25 në hyrje të fshatit Pasjan është ndaluar vetura Mercedes me targa të Serbisë, e drejtuar nga i dyshuari M. S., si dhe vetura tjetër po ashtu Mercedes me targa të Serbisë e drejtuar nga i dyshuari Z. I”, thuhet në njoftim.
Tutje bëhet e ditur se në vetura janë gjetur 64 arka me pije alkoolike.
“Gjatë kontrollit tek vetura e parë janë gjetur dhe janë konfiskuar 35 arka x 20 shishe pije alkoolike, kurse tek vetura e dytë gjatë kontrollit janë gjetur dhe janë konfiskuar gjithashtu 29 arka x 20 shishe pije alkoolike”, thuhet në njoftim.
Policia njofton se në konsultim me prokurorin kujdestar, malli i konfiskuar është përcjellë në terminalin doganor, ndërkaq rasti vazhdon të hetohet nga njësiti kompetent.
