Doganierët e Kosovës kanë parandaluar të mërkurën edhe një rast me kontrabandë të telefonave celularë, në pikën e kalimit kufitar të Bërnjakut. Sipas njoftimit, bëhet fjalë për 20 telefona me një vlerë mbi 12,000 euro.
“Oficerët doganor në pikën e kalimit kufitar të Bërnjak, gjatë hyrjes nga Serbia, kanë ndaluar një automjet. Pas pyetjes së zakonshme, “a ka diçka për të deklaruar në doganë”, shoferi është përgjigjur se “nuk ka asgjë për të deklaruar”. Më pas, oficerët kanë kryer një kontroll të detajuar të automjetit dhe të personit. Si rezultat i këtij kontrolli, janë zbuluar mallra të pa deklaruar, si në vijim: 10 iPhone Pro 14 dhe 10 iPhone Pro Max”, thuhet në njoftimin e Doganës kosovare.
Gjithsej, vlera e këtyre mallrave pa taksa thuhet se është 12,104.60 euro.
“Shoferi nuk ka paraqitur dokumentacion të nevojshëm lidhur me këto mallra. Përveç konfiskimit të mallrave, ky rast do të trajtohet në procedurën penale, në përputhje me udhëzimet e Prokurorisë Themelore në Mitrovicë, ndërsa automjeti dhe mallrat janë tërhequr dhe janë nën mbikëqyrjen e autoriteteve doganore për hetim të mëtejshëm”, thuhet më tej në njoftim.
