Një studim i ri nga Universiteti i Sidneit ka zbuluar se përdorimi i ventilatorit në mot shumë të nxehtë dhe me lagështi të lartë mund të rrisë rrezikun e atakut kardiak, veçanërisht kur trupi është në mungesë të lëngjeve, transmeton KosovaNews.
Në hulumtimin e publikuar në revistën Emergency Medicine, 20 vullnetarë u vendosën në një dhomë klimatike të rregulluar në 39°C me 49% lagështi, duke iu nënshtruar katër testeve tre-orëshe. Në dy prej tyre, pjesëmarrësit kishin marrë lëngje të mjaftueshme dhe u lejohej të pinin ujë gjatë eksperimentit. Në dy testet e tjera, ata kishin mungesë lëngjesh dhe nuk lejoheshin të pinin ujë apo të konsumonin ushqime me përmbajtje të lartë uji.
Rezultatet treguan se ventilatori, kur përdoret në kushte dehidratimi, rrit ndjeshëm ngarkesën mbi zemrën dhe mund të shkaktojë krizë kardiake. Po ashtu, ai rrit nivelin e djersitjes me rreth 60%, gjë që mund të përkeqësojë mungesën e lëngjeve.
“Në temperatura mbi 39 gradë, ventilatorët duhet fikur”
Dr. Connor Graham paralajmëroi:
“Shumë prej viktimave nga vapë ekstreme nuk kanë klimë, por kanë ventilator. Ventilatorët mund të ndihmojnë deri në 39-40°C duke ulur temperaturën e trupit dhe ngarkesën mbi zemër. Por mbi këtë nivel, ventilatori e rrit temperaturën e trupit dhe pengon aftësinë për t’u ftohur nëpërmjet djersitjes.”
Sipas Daily Mail, për personat e shëndetshëm kufiri i sigurisë është 39°C, ndërsa për ata mbi 65 vjeç rreziku fillon që në 38°C. Personat e moshuar që marrin ilaçe antikolinergjike për kontrollin e urinës duhet të jenë të kujdesshëm edhe në 37°C..
Këshillat për t’u mbrojtur nga vapë ekstreme
Mbani të mbyllura perdet dhe dritaret në dhomat ku hyn dielli.
Njihni simptomat e goditjes nga të nxehtit dhe mënyrat e reagimit.
Çfarë është goditja nga të nxehtit?
Sipas Shërbimit Shëndetësor Kombëtar të Britanisë (NHS), shenjat paralajmëruese të lodhjes nga të nxehtit përfshijnë: lodhje, temperaturë të lartë, djersitje të tepërt, etje, frymëmarrje të shpejtë, rrahje të shpejta të zemrës, dhimbje koke, nauze, të vjella, lëkurë të zbehtë dhe të ftohtë, si dhe ngërçe muskulare.
Nëse simptomat nuk përmirësohen brenda 30 minutash pasi personi është freskuar dhe ka marrë lëngje, ose përkeqësohen, duhet kërkuar ndihmë mjekësore urgjente.
Goditja nga të nxehtit ndodh kur temperatura e trupit arrin ose kalon 40°C, duke rrezikuar dëmtime të organeve dhe jetën. Shenja të tjera janë ndërprerja e djersitjes, turbullimi i vetëdijes, humbja e koordinimit, kriza epileptike dhe të fikët.
