Me rastin e shënimit të Ditës Botërore kundër Duhanit, Ministria e Shëndetësisë dhe Instituti Kombëtar i Shëndetit Publik të Kosovës (IKSHPK) organizuan një konferencë për media, ku u bë thirrje për masa të reja dhe më të rrepta kundër ndikimit të industrisë së duhanit, sidomos tek të rinjtë.
Ministri në detyrë i Shëndetësisë , Arben Vitia, tha se duhani vazhdon të jetë një ndër sfidat më serioze të shëndetit publik. Ai bëri të ditur se do të rrisin numrin e inspektimeve në hapësirat, ku është e ndaluar duhanpirja.
“Duhani sjell pasoja të rënda shëndetësore. Mbi 8 milionë njerëz në botë vdesin si pasojë e përdorimit të tij. Në Kosovë ka rënie të numrit të përdorimit të duhanit, krahasuar me vitin 2011. IKShPK ka kryer hulumtime dhe do të ofrojë së shpejti të dhëna të reja rreth përdorimit të duhanit tek të rinjtë. Por kjo nuk mjafton. Përkundër sfidave, nuk kanë munguar as rezultatet, sikurse rritja e akcizës, inspektimet dhe presim rritje të numrit të inspektorëve për shtim të inspektimeve në hapësira ku është e ndaluar duhanpirja”, tha ai.
Arben Lila nga Qendra për Avokim dhe Zhvillim (KADC) tha se industria e duhanit po përdor mjete gjithnjë e më të sofistikuara për të shënjestruar të rinjtë.
“Ne jemi këtu sot për të ritheksuar mbështetjen tonë për draft- Ligjin e ri për Kontrollin e Duhanit, i cili përmban masa thelbësore dhe të domosdoshme për të mbrojtur brezat e rinj: ndalim të plotë të reklamimit dhe promovimit të produkteve të duhanit dhe nikotinës, përfshirë ato në platformat digjitale; zbatim të paketimit standard (plain packaging) për të larguar çdo efekt joshës vizual si dhe ndalimin e shijeve të ëmbla frutash që targetojnë posaçërisht fëmijet dhe të rinjtë. Ky ligj është një hap i guximshëm, por i drejtë”, tha ai.
Zëdhënësi i IKSHPK-së, Faik Hoti, tha se rezultatet e hulumtimeve tregojnë një ulje të përdorimit të duhanit pas hyrjes në fuqi të ligjit për kontrollin e tij.
“Që nga hyrja në fuqi të ligjit për duhanin, hulumtimet që janë zhvilluar nga instituti, për fat të mirë, kanë nxjerrë edhe atë që ka qenë synim i ligjit: ulje të numrit të përdorimit të tij. Ajo çka duhet të bëjmë më shumë është ndalimi i reklamimit (të duhanit)”, tha ai.
Dita Botërore Pa Duhan (WNTD) shënohet në mbarë botën çdo vit më 31 maj, me ç’rast informohet publiku për rreziqet e përdorimit të duhanit
