Nënkryetari i Prishtinës, Alban Zogaj, ka njoftuar se parkingu nëntokësor te kampusi i Universitetit të Prishtinës do të hapet në fund të nëntorit.
Zogaj, ka treguar se ishte planifikuar që parkingu të hapej më herët, por është shtyrë për shkak të ndërrimit të dizajnit që ka bërë kryetari i Prishtinës, Përparim Rama.
“Parkingu përballë katedrales do të hapet në fund të nëntorit. Është shumë afër. Ishte paraparë të hapet më herët, por e kemi ndërruar dizajnin e pjesës së sipërfaqes. Mbi parkingun nëntokësor do të ketë gjelbërim, park urban me shtigje të ecjes e me drurë. Kryetari Rama e ka ndërruar pak dizajnin e ka zgjatur afatin kohor. Është bërë punë fantastike, do të hapet në nëntor. Do të jetë parking fantastik për qytetarët që vijnë prej jashtë Prishtinës që të parkohen aty e ta kenë më të lehtë qasjen në Qendër të Prishtinës”, ka thënë Zogaj.
Ai ka treguar se për të larguar tollovinë në Prishtinë, është planifikuar të ndërtohen tri parkingje nëntokësore në periferi.
“130 mijë vetura hyjnë nga jashtë në Prishtinë, e janë diku rreth 80 mijë vetura lokale. Në ditë të zakonshme qarkullojnë rreth 200 mijë vetura, që për rrugët e Prishtinës është enorme. Kjo na ka çuar të mendojmë të ndërtojmë parkingje nëntokësore në hyrje të Prishtinës. Një parking i madh nëntokësor është planifikuar te Stacioni i Autobusëve, një te rrethi i madh i Prishtinës, për veturat që vijnë nga Veterniku, një tjetër në hyrje të Prishtinës nga ana e Podujevës. Parkingje me kapacitet 700 deri 1000 vetura”, ka thënë Zogaj.
Këtë e bëri të ditur në një nga emisionet televizive duke e shpërndarë në llogarinë e tij Facebook.
Lexoni edhe:
