Dy deputetë nga Aleanca për Ardhmërinë e Kosovës kanw kërkuar nga Qeveria e Kosovës që të ndërmarrë veprime të guximshme dhe të sakta sa i përket krizës energjetike në vend.
Shefi i GP të AAK-së, Besnik Tahiri, ka thënë se situata rreth energjisë është e jashtëzakonshme.
Ai ka thënë se kanë dy propozime: E para lidhet me qëndrimin e AAK-së për të marrë disa veprime dhe vendime shteti i Kosovës në raport me energjinë dhe e dyta me çështjen e energjisë në veri duke e ditur se marrëveshja për energjinë atje ka skaduar.
Ai ka thënë se AAK-ja e konsideron jetike fokusin e politikave të shtetit në investime në strategji në sektorin e energjisë.
“Përmirësimi i gjendjes mund të ndodhë me tri veprime. E para më urgjente lidhet me nisjen e procedurave të shtetit të Kosovës në investime me energji me linjit. Të stimulohet dhe të subvencionohet energjia alternative. Nga sot AAK-ja ka nisur procesin e konsultimit publik për të prezantuar vizionin tonë se pse Kosova duhet të ketë investime në energji. Është paradoks që vendi është kaq i pasur me linjit dhe të mos e shfrytëzojë”, ka thënë ai.
Ndërkaq, deputeti Pal Lekaj ka folur për marrëveshjen Kosovë-Serbi sa i përket energjisë në veri të vendit, ku kompania serbe “Elektroserver” nuk i ka plotësuar kushtet që i përcakton Udhërrëfyesi për Marrëveshjen për Energji.
Lekaj ka thënë se obligimet që i ka pas “Elektroserveri” sa i përket licencës që e ka marrë është dashur t’i nënshkruaj marrëveshjet e domosdoshme teknike për të operuar në tregun e Kosovës siç është marrëveshja kornizë për aderim në rregullat e tregut, marrëveshja për detyrime të balancimit me KOSTT-in dhe marrëveshjen komerciale me KEDS. Ai tha se lidhur me këtë marrëveshje ka ngecje.
“Po ashtu KOSTT dhe KEDS nuk kanë qasje në veri. Ne e kemi përkrahë këtë marrëveshje sepse i ka kushtuar mjaft humbje buxhetit të Kosovës, e deri në përfundim të këtij vitit pothuajse do të paguhen 100 milionë euro për qytetarët që fare nuk paguajnë energji e që është diskriminim për qytetarët e tjerë që paguajnë”, tha Lekaj.
Ai shtoi se si AAK i kanë përkrahë tri vendime për shpallje të emergjencës në energji, duke menduar se kjo çështje do të përfundojë e të mos i kushtoj kaq shumë buxhetit të shtetit të Kosovës.
“Në pajtim me pikën 8 të udhërrëfyesit kërkohet një mendim nga BE-ja që deri kur dhe pse ka ngec kjo marrëveshje, dhe a mund të tërhiqet licenca”, ka thënë Lekaj.
