Pas takimit të mbajtur me homologen e saj nga Kosova, Donika Gërvalla, ministrja e Punëve të Jashtme e Sllovenisë, Tanja Fajon, është pritur të hënën nga presidentja Vjosa Osmani.
Mediat janë lejuar të marrin vetëm pamje në minutat e parë të takimit.
Pas këtij takimi, presidentja e vendit Vjosa Osmani ka postuar disa fotografi në llogarinë e saj në Facebook dhe ka shkruar se Sllovenia mbetet një nga aleatet më të rëndësishme të popullit të Kosovës.
“Sot, bashkë me Zëvendëskryeministren dhe Ministren e Punëve të Jashtme të Sllovenisë, Tanja Fajon, diskutuam për thellimin e bashkëpunimit ndërshtetëror si dhe përpjekjet tona të përbashkëta për paqe dhe stabilitet në Ballkanin Perëndimor”, ka shkruar ajo.
Pas presidentes, Fajon pritet të takojë edhe kryeparlamentarin Glauk Konjufca rreth orës 13:40.
Ndërkaq në konferencën për media të mbajtur me Gërvallën, Fajoni u deklarua rreth dialogut Kosovë-Serbi, për të cilin tha se Sllovenia e përkrah, derisa shtoi se dy vendet duhet të flasin për normalizim të raporteve.
“Çdo situatë e krizës rrezikon imazhin e shtetit dhe për këtë duhet të mos futemi në këtë. I jam ofruar për të ndihmuar në normalizimin mes shteteve. Siç e dini, Sllovenia e mbështet dialogun mes Kosovës dhe Serbisë. Dhe gjithmonë flasim kur bëhen gjendje të reje. Në prill do të kemi zgjedhje që këto në pjesën veriore duhet të jenë të lirë dhe të ndershme”, deklaroi Fajon.
