Presidentja e Republikës së Kosovës, Vjosa Osmani, ka pritur në takim përfaqësuesit e Shoqatës për Mbrojtjen e të Drejtave të Pacientëve, me të cilët diskutoi për sfidat aktuale në sistemin shëndetësor dhe nevojën për fuqizimin e të drejtave të pacientëve në vendin tonë.
Presidenca ka njoftuar se gjatë takimit, presidentja Osmani theksoi rëndësinë e ngritjes së vetëdijes publike për të drejtat e pacientëve, si dhe nevojën për përmirësimin e qasjes në shërbime cilësore, transparente dhe të barabarta shëndetësore për të gjithë qytetarët.
“Presidentja Osmani ritheksoi përkushtimin e saj për një sistem shëndetësor që vendos pacientin në qendër të vëmendjes dhe garanton trajtim dinjitoz për çdo qytetar, pa dallim”, theksohet në njoftim.
Mbrojtja e të drejtave të pacientëve, sipas Presidentes Osmani është një indikator i rëndësishëm i funksionimit demokratik dhe etik të shtetit.
