Organizata për Demokraci, Anti-korrupsion dhe Dinjitet, “Çohu!” ka mbajtur konferencë për media në të cilën ka prezantuar të dhëna për cilësinë e derivateve të naftës në Kosovë.
Drejtori ekzekutiv i kësaj organizate Arton Demhasaj, ka paraqitur disa prej gjetjeve të cilësisë së naftës që hyn në Kosovës.
Në hulumtimin e “Prepotr” është thënë se ndonëse janë ndërmarrë veprimet për përmirësimin e cilësisë së naftës e derivateve, ato mbesin sfidë. Është thënë se sistemi i kontrollit që bëhet nga institucionet nuk siguron cilësi të duhur të derivateve të naftës.
Demhasaj ka thënë se sipas të dhënave të Doganës së Kosovës, për vitin 2022 kompanitë kanë importuar naftë dhe derivate të saj në vlerë prej 58147.82785 ton. Kjo sasi e naftës ka ardhur nga vendet si Serbia, Greqia, Maqedonia e Veriut etj.
“Hulumtimi ka gjetur se gjatë vitit 2022 janë ndërmarrë disa veprime për ngritje të cilësisë së derivateve të naftës por që nuk duken të mjaftueshme. Kjo sipas hulumtimit ndodhë për shkak se Ministria e Industrisë, Ndërmarrësisë, Tregtisë, nuk i ka kapacitetet e nevojshme për të garantuar cilësi më të madhe të derivateve të naftës”, tha Demhasaj.
Po ashtu në konferencë nga Demhasaj u prezantuan të dhënat e një anketimi me rreth 300 respondentë i realizuar nga “Çohu!”, përmes të cilit qytetarët kanë dhënë mendimet e tyre lidhur me cilësinë e naftës dhe derivateve të saj.
Më shumë se 60 për qind e respodentëve kanë thënë se cilësia e derivateve të naftës nuk është aspak e mirë. Mesatarisht e mirë kanë menduar 27 për qind e respodentëve. Ndërsa e mirë vetëm rreth 4 për qind e tyre.
Në pyetjen se a kanë vërejtur përmirësim të cilësisë së naftës, viteve të fundit vetëm më shumë se pesë për qind prej tyre kanë thënë po, pak 21 për qind, nuk kanë vërejtur përmirësim kanë thënë më shumë se 73 për qind të respodentëve.
Qytetarët në shumicë kanë thënë se kanë pasur defekte në automjetet e tyre për mungesë të cilësisë së naftës dhe benzinës.
