Kryetari i Sindikatës së Minatorëve të “Trepçës”, Ibrahim Januzi, ka njoftuar se janë nxjerrë të gjithë 40 minatorët që kishin mbetur të ngujuar brenda minierës që nga orët e hershme të së hënës.
Rreth orës 3 të mëngjesit minatorët ishin bllokuar brenda minierës, fillimisht ishin nxjerrë 10 minatorë, ndërsa para disa minutave janë nxjerrë edhe 30 minatorët tjerë. Januzi ka thënë se gjendja e tyre shëndetësore është e mirë.
“Sapo ka përfunduar nxjerrja e minatorëve. Të gjithë minatorët kanë dalë dhe fatbardhësisht janë shëndosh e mirë, vetëm se kanë shqetësime për shkak të kohës së gjatë që kanë kaluar aty”, tha Januzi në KTV.
Januzi ka thënë se raste të tilla të bllokimit të minatorëve janë shpeshtuar kohëve të fundit.
“Kohëve të fundit është duke na u paraqitur më shpesh, kemi defekt të ndryshme herë me energjinë eklektike, por në këtë rast është defekt në ashensorin e minierës, një defekt teknik, i cili për momentin ka qenë i pariparueshëm, por kemi bërë një alternativë tjetër të cilën e kemi shfrytëzuar edhe i kemi nxjerr minatorët”, ka theksuar Januzi.
Ai ka thënë se kjo po ndodh si pasojë e vjetërsisë së makinës ngritëse.
“Nuk janë bërë investime kapitale, kjo makinë daton që nga vitet e 60’, për shkak të mungesës së investimeve këto defekte janë duke u shpeshtuar”, është shprehur Januzi, duke thënë se për këto kanë njoftuar menaxhmentin e ndërmarrjes e edhe Qeverinë.
