Një sulm seksual është regjistruar një ditë më parë në shkollën fillore „Kajtaz Ramadani„ në fshatin Kijevë të komunës së Malishevës.
Punëtori teknik dyshohet se ka sulmuar seksualisht një nxënëse të klasës së tetë të kësaj shkolle, në kohën kur ajo ishte në banjë. Për rrethanat se si ka ndodhur ky rast, ka folur drejtori i shkollës.
„Ka kërkuar leje prej mësueses, për të shkuar në banjo sepse nuk e ka ndier veten mirë. Banjoja është poshtë ka shkuar janë të prishura disa çeshme, kështu që ka kërkuar tash ndihmë prej punëtorit teknik i cili është tash mirëmbajtës i shkollës, si dhe ka kontroll tash edhe nxemjen, punëtor shumë i vyeshëm, ka kërkuar prej tij të vijë ta rregullojë ta lëshoj ujin. Ka ardhur punëtori shihet shumë mirë në kamerë, hyn në vendin ku lëshohet uji, edhe një çeshme ka qenë e lëshuar por çeshmja që është desht vajza me i pastruar duart nuk ka qenë në rregull, ka hyrë dhe e ka rregulluar, thotë që e ka rregulluar atë edhe ka dalë, ka shkuar në atë klasën ku ka qenë” , tha Bedri Toplana, drejtor i Shkollës Fillorë të Mesme të Ulët „ Kajtaz Ramadani”, në Kijevë.
Për të konfirmuar rastin, në prani të Policisë janë kontrolluar kamerat e shkollës. Mirëpo mësohet se në momentin kur nxënësja ishte duke dalë nga banja, njëra nga kamerat nuk ishte duke punuar. Njësitet relevante të policisë i janë përgjigjur rastit dhe është arrestuar i dyshuari.
Në anën tjetër, veprime ndaj të dyshuarit për sulm seksual janë ndërmarrë edhe nga ana e komunës së Malishevës. I njëjti është suspenduar nga puna.
“Në angazhimin tim si drejtoreshë e arsimit në kompetenca të mija është marrë vendimi për suspendimin nga detyra deri në një vendim të prokurorisë “, tha Arbresha Krasniqi – Drejtoreshë e Arsimit – Malishevë.
Nga ana tjetër, familjarët e viktimës nuk kanë dashur të deklarohen rreth rastit duke ua lënë në dorë organeve të sigurisë./rtk
