Një rrahje masive të ndodhur në një nga rrugët kryesore të Kllokotit. Disa persona dyshohet të jenë të përfshirë në sherr, teksa në vendin e ngjarjes ishin prezent edhe njësitet policore dhe ato të ndihmës së parë mjekësore.
Rastin e ka konfirmuar edhe zëdhënësi i Policisë për rajonin e Gjilanit, Ismet Hashani.
Hashani deklaroi një person nga fshati Zhiti është lënduar, teksa tre persona janë shoqëruar në stacion policor. Sipas tij, deri te konfrontimi fizik ka çuar një mosmarrëveshje në trafik.
“Ju njoftojmë se rreth orës 21:00, policia e Kosovës ka pranuar një informatë për një rast rrahje në Kllokot. Patrulla nga stacioni policor në Kllokot, i është përgjigjur rastit. Nga hetimet e para besohet se pas një mosmarrëveshje që kanë pasur në trafik, në rrugën Viti-Kllokot, disa persona, meshkuj kosovarë-shqiptarë, me dy vetura, janë ndalur para “Viva Fresh Store” në Kllokot dhe dyshohet të jenë përleshur fizikisht.
Në stacionin policor janë sjellë tre persona. Për momentin, dyshohet se një person nga fshati Zhiti, është i lënduar. Është njoftuar Prokurori i shtetit dhe hetimet lidhur me rastin janë duke vazhduar nga Policia e Kosovës në Kllokot” tha Hashani.
