Reagimi i shpejtë, me kohë dhe profesional nga stafi shëndetësorë i QKUK-së, ka bërë që pacientit R.M. (75-vjeçar), t’i shpëtohet jeta dhe t’i kthehet jetës normale.
Në një njoftim për media të Shërbimit Spitalor Klinik dhe Universitar të Kosovës thuhet se pacienti kishte ardhur në Klinikën e Kardiologjisë në QKUK, pasi kishte pësuar infarkt akut të miokardit, gjendje pas implantimit të CRT, Cardiomyopathy Dilatativa, Insuficiencë e avancuar kardiake, si dhe sëmundje e sheqerit.
Fillimisht pacientit i ishte bërë Koronarografia dhe vërtetohet se ka ngushtime (stenoza) të avancuara të arterieve koronare, duke përfshirë edhe trungun e përbashkët (left main).
Për shkak të kompleksitetit së sëmundjes kardiake (zemër e dilatuar, me fraksion ejeksioni rreth 25%, me pajisje sinkronizuese të zemrës – CRT të implantuar me herët), konziliumi kardiologë- kardiokirurgë vendosi për stentimin e trungut të përbashkët (unprotected left main coronary artery disease), pasi që pacienti ka rrezikshmëri të lartë për operacion të hapur (by-pass).
“Stentimi i kryer në Klinikën e Kardiologjisë të Qendrës Klinike Universitare të Kosovës, është trajtuar me sukses si dhe stentimi i LM-LAD te pacienti 75 vjeç, dhe kjo paraqet një nga ndërhyrjet më komplekse në fushën e Kardiologjisë Invazive”, thuhet në njoftim.
Sipas Shërbimit Spitalor Klinik dhe Universitar të Kosovës, trajtimi i tillë bëhet vetëm në qendrat e njohura të kardiologjisë invazive në botë.
