Institucionet e Kosovës kanë nisur përgatitjet për zbatimin e vendimit për regjistrim me targa RKS të mjeteve që posedojnë targa ilegale, të lëshuara nga Serbia.
Siç njofton Ministria e Punëve të Brendshme, të mërkurën është mbajtur takimi informues në Agjencinë për Regjistrim Civil të Ministrisë së MPB-së me udhëheqësit e Qendrave për Regjistrim Automjetesh.
“Në këtë takim u diskutua për zbatimin e Vendimit Nr. 01/85 të Qeverisë së Republikës së Kosovës të datës 29.06.2022, si dhe u vunë në pah modalitetet për formën se si do të shkojë ky proces për regjistrimin e mjeteve, sipas Udhëzimit Administrativ, Nr. 03/2022 për regjistrimin me targa ‘RKS’ të mjeteve që posedojnë targat ‘PR’, ‘KM’, ‘PZ’, ‘GL’, ‘UR’, ‘PE’ DHE ‘DA’ APO ‘ĐA’”, thuhet në njoftim.
Me vendim të qershorit, qytetarëve, kryesisht atyre në veri, u jepet edhe një shans, siç është thënë të fundit, për kthim në targa RKS. Sipas Qeverisë, pronarëve të veturave me këto targa u është mundësuar që kthimin në RKS ta bëjnë në periudhën 1 gusht 2022 – 30 shtator 2022, pra dy muaj kohë.
“Vendimi ka karakter të papërsëritshëm pas përfundimit të periudhës së vlefshmërisë. Vendimi obligon Ministrinë e Punëve të Brendshme që të ndërmarrë të gjitha veprimet dhe masat e nevojshme me qëllim të realizimit të këtij procesi”, thuhej në njoftim.
https://www.facebook.com/RKS.MPB/posts/pfbid02hWJya2XZsqg6gw9SEQvEeir1ftDJqQxEgNzpPTsVoZggkUVGjhd6pjxeqmgc5SUBl