Kryeministri izraelit, Benjamin Netanyahu, mbajti sot një fjalim në Asamblenë e Përgjithshme të Kombeve të Bashkuara në New York, ku u përball me një sallë gati bosh, pasi dhjetëra delegatë u larguan në shenjë proteste sapo ai mori fjalën, transmeton KosovaNews.
Gjatë fjalimit, Netanyahu e quajti njohjen e një shteti palestinez “çmenduri të pastër” dhe “marrëzi”, duke shtuar se veprimi i disa shteteve që e kanë njohur tashmë Palestinën është “i turpshëm”.
Ai tha se fjalimi i tij po transmetohej në Gaza përmes altoparlantëve të vendosur në territorin izraelit, ndërsa iu drejtua pengjeve që po mbahen nga Hamasi:
“Nuk ju kemi harruar, as edhe për një sekondë. Populli i Izraelit është me ju.”
Fjalimi i Netanyahut vjen në një kohë kur presidenti amerikan Donald Trump ka deklaruar se nuk do të lejojë Izraelin të aneksojë Bregun Perëndimor të pushtuar. Të dy pritet të takohen të hënën.
Izraeli aktualisht po përballet me presion të shtuar ndërkombëtar për t’i dhënë fund konfliktit dhe për të ndalur pushtimin e territoreve palestineze.
