Në fshatin Bukosh të Suharekës për të dytin vit me radhë po organizohet turniri i volejbollit “Genc Zyba” i cili fillon me datë 25 gusht 2023. Ky turnir do të mbahet në kujtim të volejbollistit profesionist Genc Zyba i cili ka luajtur në klubin e volejbollit “Theranda”.
Me nismën e familjarëve dhe bashkëfshatarëve si dhe me përkrahjen e shumë bizneseve nga komuna e Suharekës ky turnir tashmë po merrë përmasa gjithpërfshirëse ku pritet të marrin pjesë ekipe nga e gjithë Kosova.
Organizatorët thonë se janë duke bërë përgaditje intensive në mënyrë që ky turnir të jetë sa më madhështor dhe gjithpërfshirës.
Paraqitja e ekipeve ka filluar nga dita e djeshme dhe do të jetë e hapur për një muaj pra deri më 21 gusht, ndërsa tërheqja e shorteve do të bëhet me datë 22 gusht.
Shpërblimi për vendin e parë është 1500 euro ndërsa vendi i dytë do të shpërblehet me 700 euro.
Kujtojmë se ish-volejbollisti i klubit “Theranda” vdiq tragjikisht me 15 mars të vitit 2016 pas një ataku kardiak, ai ishte njëri ndër volejbollistët më të mirë që kishte Kosova.
