Një medikament që përdoret tek të porsalindurit mungon tash e një kohë në Klinikën e Neonatologjisë në QKUK. Për pasojë, prindërit e foshnjave kanë kërkuar ndihmë për ampulën edhe në rrjete sociale. Drejtoria e ShSKUK-së nuk ka lejuar menaxhmentin e Klinikës të japë informacione rreth produktit, e përmes një përgjigjeje me shkrim ka dhënë si arsye mungesën e ofertuesve në tenderim
Ampula Prostaglandin E1, tretësirë për injeksionet që u jepen foshnjave të porsalindura, mungon në barnatoren e Qendrës Klinike dhe Universitare.
Medikamenti që ndihmon qarkullimin e gjakut te problemet me zemër te neonatët nuk ndodhet në Klinikën e Neonatologjisë.
E për të siguruar këtë ampulë, prindërit kanë kërkuar ndihmë edhe në rrjete sociale.
Sipas një përgjigjeje me shkrim nga Shërbimi Spitalor, Klinik e Universitar i Kosovës, ka mungesë të produktit tash e një kohë të gjatë.
“Të nderuar, sa i përket produktit Prostaglandin E1, ju informoj që produkti në fjalë është mungesë një kohë të gjatë dhe në bazë të informacionit nga përgjegjësit e sektorit, arsyeja e mungesës është mungesa e ofertuesve në tenderim. Ndërsa pyetjet e tjera mund t’i adresoni në Klinikën e Neonatologjisë”, thuhet në përgjigjen e SHSKUK-së per kohen.
Në SHSKUK nuk kanë treguar se, nëse nuk kanë aplikuar ofertuesit përmes tenderit të rregullt, a e kanë ftuar dikë përmes procedurave me negocim.
Përmes përgjigjes me shkrim nuk kanë dhënë më shumë informacione as për specifikat e këtij medikamenti dhe numrin e foshnjave që trajtohen me të.
Edhe pse drejtoresha e Klinikës së Neonatologjisë, Hajrie Ismaili ka pranuar të flas për mungesën e barnave specifike për kujdes neonatal, drejtoria e përgjithshme e SHSKUK-së nuk ka aprovuar kërkesën e televizionit që një javë për intervistim.
Ky bar është pjesë e listës esenciale dhe është një prej disave që mungon në barnatoret e QKUK-së.
