Qarkullimi i veturave në urën që lidh Rusinë dhe gadishullin e Krimesë, e cila është aneksuar ilegalsiht nga Moska, u ndal për shkak të një “emergjence”, tha guvernatori i rajonit, Sergei Aksyonov nga Rusia.
Edhe pse raportet për të paktën një shpërthim në urë mbeten të pakonfirmuara, Ukraina ka thënë se incidenti mund të jetë një veprim provokues i orkestruar nga Rusia.
“Kishte një emergjencë në zonën e shtyllës 145 nga Territori i Krasnodarit (në anën ruse të urës). Agjencitë e zbatimit të ligjit dhe të gjitha shërbimet përgjegjëse janë duke punuar”, shkroi Aksyonov në Telegram.
Sipas zyrtarëve të transportit të territorit të Krasnodarit të Rusisë, bllokimi i trafikut në hyrje të urës së Krimesë shtrihej për rreth 3 kilometra.
Ura rrugore dhe hekurudhore prej 19 kilometrash u hap në vitin 2018 dhe është një rrugë e rëndësishme transporti midis Rusisë dhe rajonit të Krimesë, të cilën Moska e aneksoi ilegalisht në 2014.
Ura u mbyll pjesërisht pasi një shpërthim i madh në tetor të vitit të kaluar dëmtoi strukturën e saj, në atë që Moska pretendoi se ishte një akt terrorist.
Vyacheslav Gladkov, guvernatori i rajonit Belgorod të Rusisë, tha në Telegram se një çift u vra në urë dhe vajza e tyre u plagos, pa dhënë detaje mbi shkakun e vdekjeve.
Raportet, të cilat nuk mund të verifikoheshin në mënyrë të pavarur, u përshkruan nga një zëdhënëse ushtarake ukrainase si një provokim i mundshëm nga Rusia.
“Provokime të tilla, të cilat pushtuesit e Krimesë nxitojnë t’i raportojnë me zë të lartë, janë një mënyrë tipike për zgjidhjen e problemeve nga autoritetet e Krimesë dhe shteti agresor”, tha Nataliya Humenyuk për mediat ukrainase.
Burimet lokale të lajmeve përmendën se banorët dëgjuan shpërthime para agimit, megjithëse nuk është dhënë asnjë konfirmim zyrtar.
Shkalla e dëmit nga shpërthimi mbetet e paqartë, por guvernatori Sergei Aksyonov tha se priste që trafiku hekurudhor në urë të rifillonte brenda disa orësh.
Nga fotot e postuara nga një kanal në Telegram, i lidhur me shërbimet e sigurisë ruse, shihej një korsi në rrugën e urës të copëtuar dhe një makinë të zezë me dëmtime të rënda në pjesën e përparme.
E hapur në vitin 2018, ura prej 19 kilometrash është lidhja kryesore tokësore midis Rusisë dhe gadishullit të Krimesë, shkruan REL.
Ndërsa Andriy Yusov, një zëdhënës i departamentit të inteligjencës ushtarake të Ukrainës, nuk pranoi të komentojë mbi incidentin, ai theksoi se “gadishulli përdoret nga rusët si një qendër e madhe logjistike për lëvizjen e forcave dhe aseteve thellë në territorin e Ukrainës. Çdo çështje logjistike i komplikon gjërat për pushtuesit”.
Të hënën, Natalia Humeniuk, zëdhënësja e komandës ushtarake jugore të Ukrainës, tha se incidenti në urën e Krimesë mund të jetë potencialisht një akt i qëllimshëm provokimi i orkestruar nga Moska.
