Është ndaluar një person në Ferizaj në kohëzgjatje prej 48-orësh, i njëjti dyshohet se e ka dhunuar viktimën e cila dyshohet se ka ngecje në zhvillim mendor.
Fillimisht viktima ishte raportuar e zhdukur nga familjarët e saj.
Prokuroria Themelore në Ferizaj ka njoftuar se dyshohet që i njëjti kishte marrë me veturë viktimën dhe dyshohet se ka kryer marrëdhënie seksuale me të në një motel si dhe ndaj të njëjtës ka ushtruar dhunë fizike, andaj, me këto veprime, dyshohet se ka kryer veprën penale ‘Dhunimi”.
“Viktima dyshohet se ka ngecje në zhvillim mendor dhe e njëjta nga familjarët e saj ditë më parë është raportuar e zhdukur. Nga hetuesit rajonal të Policisë, viktima është dërguar fillimisht në Urgjencën e Kaçanikut ku i është dhënë ndihma mjekësore dhe më pas e njëjta është dërguar për ekzaminim gjinekologjik në Institutin e Mjekësisë Ligjore në Prishtinë”, thuhet në njoftim.
Prokuroria Themelore në Ferizaj, ndaj të dyshuarit, brenda afatit ligjor do të parashtrojë kërkesë për caktimin e masës së paraburgimit në Gjykatën kompetente.
