Ministrja Arsimit Shkencës Teknologjisë dhe Inovacionit, Arbërie Nagavci, ka raportuar të martën në Komisionin Parlamentar për Arsim, Shkencë, Teknologji, Inovacion, Kulturё, Rini dhe Sport, ku në pika të shkurtra përmendi prioritetet e sfidat që është ballafaquar kjo ministri.
Ajo, në mënyrë përgjithësuese përmendi aktivitetin e Ministrisë që nga edukimi në fëmijërinë e hershme deri në shkollimin parauniversitar, duke u përkushtuar në përmirësimin e infrastrukturës ligjore.
Ministrja Nagavci në mënyrë kronologjike përmendi të arriturat e kësaj ministrie si: edukimin e fëmijëve të hershëm; formimin e Komitetit Këshilldhënës për edukim të fëmijëve të hershëm; ndërtimi i disa shkollave dhe çerdheve, në bashkëpunim me komunat për t’iu shmangur pengesave të ndryshme; ndërmarrja e masave të reja në përmirësimin e kushteve për arsimin parauniversitar.
Tutje, ministrja Nagavci vuri në dukje edhe mbështetjen e mësuesve të sëmurë, ku u janë ndarë një buxhet i konsiderueshëm për mbështetje të tyre.
Veç kësaj, ministrja Nagavci përmendi edhe faktin e punësimeve të asistentëve për fëmijët në nevoja të veçanta. Pastaj finalizimin e projektligjit për tekste shkollore që është dërguar në Kuvend për miratim.
Si arritje tjetër, Nagavci përmendi edhe formimin e 4 grupeve punuese për shikimin e performancës së punës së mësuesve, si dhe licencimin e mësuesve, që, sipas saj, do të shërbejë si motivim për punën e tyre edukative.
Më tej, ministrja Nagavci përmendi edhe ndihmën që kjo ministri ka ndihmuar nxënësve në Luginë të Preshevës.
Ajo ka vënë në dukje edhe përmirësimin e cilësisë së teksteve mësimore, si dhe ofrimin e shërbimeve të këshillimit në karrierë për shkolla të mesëm të ulët.
“Kemi lansuar planin strategjik për arsim 2022-2026, ku është harmonizuar me planin strategjik në draftin e arsimit”, tha, mes tjerash, ministrja Nagavci.
Ajo më tej përmendi shifra në ngritje të buxhetit për arsim, ku sipas saj, më 2023 buxheti është 82 milionë euro, pra 9.712 milionë më shumë se më 2022, e sivjet mbi 12% më shumë se viti paraprak.
Ndërsa lidhur me shkollimin e minoriteteve ministrja Nagavci dha shifra konkrete që dëshmojnë kujdesin për ofrimin e kushteve në edukim edhe të komuniteteve tjera në vend, që nga edukimi i hershëm e deri në nivelin parauniversitar, duke përkthyer edhe tekstet shkollore në gjuhët e tyre.
Ndërkaq, si sfidë të theksuar, ministrja Nagavci përmendi gjendjen e krijuar nga pandemia COVID-19, si dhe grevat e shtatorit të organizuar nga SBAShK-u, ku, për sanimin e gjendjes së krijuar, ministria që ajo udhëheq, organizon mësimin plotësues të shtunave.
Pos kësaj ajo si të arritur të kësaj ministrie përmendi edhe formimin e Komitetit Kosovë-BE për Kërkim e Inovacion, si dhe një varg përfitimesh tjera, duke shtuar edhe anëtarësimin e Universitetit të Prishtinës pas tre vjetësh në instancat ndërkombëtare, por edhe funksionalizimin e Këshillit Kombëtar të Shkencës.
Më tej, ministrja Nagavci vuri në pah përfitimet që do të dalin nga “Procesi i Berlinit” në nënshkrimin e marrëveshjeve për njohjen e arsimit të lartë të vendeve të rajonit e që më së shumti do të përfitojnë shqiptarët që jetojnë në Luginë të Preshevës.
Por si e arritur kryesore e kësaj ministrie Nagavci përmendi abetaren e përbashkët me të cilën mësojnë të gjithë fëmijët që jetojnë në Shqipëri e Kosovë.
