Ministri në detyrë i Financave, Hekuran Murati, që është edhe deputet i Lëvizjes Vetëvendosje, ka thënë se refuzimi i deputetëve nga PDK-ja, LDK-ja e AAK për ta votuar si nënkryetar një deputet që nuk është i Listës Serbe, sipas tij, nënkupton se këto parti po e ruajnë pozitën e nënkryetarit për dikë të Listës Serbe.
“Vetëm se duke mos pasur guximin politik ta votojnë qysh tash dikë të Listës Serbe, po presin derisa çështja të shkojë në Gjykatë Kushtetuese (për këtë edhe u bënë kinse e përjashtuan nga AAK deputetin Adem Hoxha, që ai t’ia sigurojë nënshkrimin e 10-të Listës Serbe), me shpresën që Gjykata Kushtetuese i nxjerr nga situata, që pastaj të thonë se “s’patëm qare pa votu se na detyroi Gjykata Kushtetuese”, ka shkruar ai në rrjetet sociale.
Deputeti i Vetëvendosjes pretendimet e disa partive politike se nënkryetari serb duhet të jetë vetëm nga Lista Serbe, sepse ndryshe shkelet Kushtetuta, i ka quajtur të pavërteta.
“A shkelet Kushtetuta nëse zgjidhet Nenad Rashiq? Pretendimi i opozitës se gjoja vetëm një deputet i Listës Serbe mund të zgjidhet nënkryetar i Kuvendit se përndryshe po u shkelka Kushtetuta, është i pavërtetë. Kushtetuta e thotë që nënkryetari duhet të jetë nga radhët e deputetëve që përfaqësojnë komunitetin jo-shumicë serb, kaq. Pra nuk ka ekskluzivitet apo monopol Lista Serbe në këtë rast”, ka shkruar tutje Murati.
Ai ka treguar se pse në vitin 2021 u zgjodh deputeti i Listës Serbe nënkryetar Kuvendi.
“Në vitin 2021, që të gjithë 10 deputetët që përfaqësojnë komunitetin jo-shumicë serb në Kuvend ishin nga Lista Serbe, pra nuk kishte opsion tjetër. Kurse tash në vitin 2025 janë 9 deputetë nga Lista Serbe dhe 1 deputet që nuk është i Listës Serbe, pra ka opsion tjetër. Për më tepër, ndërmjet këtyre dy kohëve e kemi edhe sulmin terrorist në Banjskë të udhëhequr nga terroristi Milan Radojçiq, i cili ende sillet i lirë në Serbi dhe vazhdon ta dirigjojë Listën Serbe. Ky është argumenti i cili do duhej të bindte secilin deputet të Kuvendit që të mos e votojnë askënd nga Lista Serbe për nënkryetar të Kuvendi”, ka shkruar Murati.
Seanca konstituive do të vazhdojë nesër në tentimin e radhës për të zgjedhur nënkryetarin e pestë të Kuvendit që i takon komunitetit serb të përfaqësuar në Kuvend.
Në dy seancat e fundit atë të 26 gushtit kur u zgjodh kryetari e katër nënkryetarët dhe në seancën e 28 gushtit, dështoi zgjedhja e nënkryetarit të komunitetit serb.
Lista Serbe si parti me 9 deputetë ka insistuar në emrin e Slavko Simiqit për këtë pozitë, emri i të cilit doli për votim tri herë e që nuk mori votat e mjaftueshme.
Derisa Lista Serbe e kishte të vetmin emër Slavko Simiqin, kryekuvendari Basha sqaroi se i njëjti nuk mund të dilte më në votim bazuar në aktgjykimin e ri të Kushtetueses.
Bazuar në Rregulloren e Kuvendit të Kosovës kryetari i Kuvendit vendosi që zgjedhja e nënkryetarit serb të bëhej përmes shortit, por as me këtë formë nuk arriti të zgjidhej ai.
Në garë për nënkryetar në dy seancat e fundit ishte edhe Nenad Rashiq, i cili e propozoi vetën për këtë post e të njëjtit iu tërhoq emri edhe përmes shortit, por as ai nuk arriti t’i merrte votat e mjaftueshme.
Nenad Rashiq e ka vetëm edhe një mundësi, meqë ai ka dështuar dy herë të merrte këtë mandat.
