Në mungesë të të akuzuarit Bejtullah Shala ka dështuar të mbahet seanca e së hënës, ku i njëjti së bashku me Latif Ibrahimin akuzohen se si zyrtarë të gjendjes civile në Komunën e Fushë-Kosovës kanë keqpërdorur detyrën zyrtare.
Në lidhje me mungesën e të akuzuarit Shala, mbrojtësi i tij, me autorizim zëvendësues avokati Asdren Mekaj ka njoftuar gjykatën se bazuar në një raport mjekësor i njëjti për shkak të gjendjes jo të mirë shëndetësore nuk mund të jetë i pranishëm.
Përkundër mungesës së tij, të pranishëm ishin i akuzuari Ibrahimi dhe prokurorja e shtetit Merrushe Llugiqi, raporton “Betimi për Drejtësi”.
Ndryshe, në seancën fillestare të mbajtur me 12 nëntor 2021, të akuzuarit Ibrahimi dhe Shala janë deklaruar të pafajshëm lidhur me akuzat se kanë keqpërdorur detyrën zyrtare.
Në këto rrethana, në mungesë të kushteve ligjore për mbajtjen e kësaj seance, e njëjta është shtyrë, ndërsa e radhës pritet të mbahet më 8 shkurt të vitit 2023.
Sipas aktakuzës së ngritur më 15 janar 2019, nga Prokuroria Themelore në Prishtinë, Latif Ibrahimi dhe Bejtullah Shala po akuzohen se në cilësinë e zyrtarëve të Gjendjes Civile në Komunën e Fushë Kosovës, duke e shfrytëzuar detyrën apo autoritetin zyrtar, kanë tejkaluar kompetencat e tyre zyrtare, duke vepruar në kundërshtim me Ligjin për Shtetësinë e Kosovës.
Siç thuhet në aktin akuzues, të akuzuarit pa i përfillur procedurat e fitimit të shtetësisë së Republikës së Kosovës dhe pa pasur vendim mbi fitimin e shtetësisë, në mënyrë të kundërligjshme, i kanë regjistruar personat në regjistrat e gjendjes civile.
Me këtë, ata po akuzohen se kanë kryer veprën penale “keqpërdorim i pozitës apo autoritetit zyrtar”, nga neni 422 par.1 të Kodit Penal, vepër e cila dënohet me burgim prej gjashtë muaj deri në pesë vjet.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
