“Gjatë rifillimit të procesit të numërimit janë identifikuar gjithsej 75 fletëvotime me shpërputhje në numrin serik. Nga këto, 43 kanë rezultuar të papërdorura, ndërsa 32 të përdorura në procesin zgjedhor,” ka deklaruar Armend Muja. Ai ka bërë të ditur se nga fletëvotimet e përdorura, 17 i përkasin kandidatit të PDK-së, 10 kandidatit të LVV-së, ndërsa 5 janë pa numër serik.
“Defekti teknik është identifikuar dhe dokumentuar. Shpërputhjet në numrat serikë kanë ndodhur për shkak të një problemi në një nga kokat e printimit, dhe përjashtohet çdo mundësi ndërhyrjeje të jashtme apo falsifikimi,” ka theksuar Muja.
Sipas tij, çdo fletëvotim ka qenë i pajisur me elemente sigurie dhe i gjurmueshëm në sistem.
“Asnjë fletëvotim nuk ka dalë jashtë kontrollit. Procesi i numërimit është zhvilluar nën vëzhgim të subjekteve politike dhe institucioneve përkatëse, duke garantuar transparencë dhe integritet të plotë zgjedhor,” ka shtuar ai.
Muja ka përmbyllur se gjetjet e deritanishme nuk lënë hapësirë për dyshime mbi manipulim apo ndërhyrje të qëllimshme.
“Procesi është i pastër dhe i kontrolluar në çdo hap,” ka përfunduar Armend Muja.
