Ministria e Punëve të Jashtme dhe Diasporës e Republikës së Kosovës u bën thirrje të gjithë shtetasve të Republikës së Kosovës dhe pjesëtarëve të mërgatës që planifikojnë të kalojnë tranzit përmes territorit të Serbisë, të shmangin të gjitha hyrjet dhe daljet në vendkalimet kufitare mes Kosovës dhe Serbisë.
Kjo thirrje është bërë në kuadër të paralajmërimeve nga të ashtuquajturit “Këshill Organizativ për Bllokada” në Serbi, i cili ka njoftuar se më 6 shtator 2024 do të ketë bllokada të rrugëve që çojnë drejt vendkalimeve kufitare me Republikën e Kosovës.
MPJD rekomandon që të gjithë qytetarët dhe pjesëtarët e mërgatës të ndjekin me kujdes zhvillimet dhe paralajmërimet e reja lidhur me situatën dhe të informohen vetëm nga burimet zyrtare të institucioneve të Republikës së Kosovës për të shmangur dezinformatat dhe lajmet e rreme.
