Pas pranimit të një kontingjenti të ri me dokumente blanko, ka filluar të stabilizohet situata e furnizimit me dokumente të udhëtimit dhe me patentë-shoferë për të gjithë qytetarët e Republikës së Kosovës, njofton Ministria e Punëve të Brendshme (MPB).
“Me qëllim të furnizimit me pasaporta dhe patentë-shoferë për ata që janë në pritje si dhe aplikimet e reja, Ministria e Punëve të Brendshme, përkatësisht Agjencia e Regjistrimit Civil, do të punojë me kapacitete të plota të prodhimit ditor dhe angazhimin e stafit edhe jashtë orarit të rregullt të punës”, njofton MPB.
Sipas këtij dikasteri, qytetarët të cilët kanë aplikuar në muajin shtator dhe tetor dhe ato urgjente, tashmë janë pajisur me dokumente, ndërsa do të vazhdojnë të pajisen me dokumente personale të gjithë ata qytetarë të cilët janë në pritje sipas renditjes, respektivisht datës së mëhershme të aplikimit.
“Ministria e Punëve të Brendshme falënderon të gjithë qytetarët e Republikës së Kosovës për mirëkuptimin dhe durimin e treguar gjatë këtyre muajve”, thuhet në njoftimin për media të MPJ-së.
