Për shkak të mosfunksionalizimit të objektit të ri të Fakultetit të Bujqësisë dhe Veterinarisë, një pajisje me vlerë mbi 20 mijë euro qëndron në magazinë. Për pasojë, studentët nuk mund t’i shohin strukturat anatomike të kafshëve në 3D. Autoritetet e Fakultetit nuk ia mundësuan KOHËS xhirimin e pajisjes.
Mbi 20 mijë euro u shpenzuan në blerjen e një pajisjeje për Fakultetin e Bujqësisë dhe Veterinarisë, me qëllim që studentët t’i shihnin strukturat anatomike të kafshëve në 3D.
Por atë nuk e përdorin, meqë ka mungesë hapësire për ta vendosur brenda objektit.
E hapësirën për vendosjen e saj do ta mundësonte funksionalizimi i objektit të ri të Fakultetit, i cili ka filluar të ndërtohet që në vitin 2013, por as edhe këtë vit nuk është i gatshëm për studentët.
“Na ka penalizuar goxha se anatominë e kemi mësuar me ligjërata, me ushtrime, por nuk i kemi pasur aparaturat që janë të nevojshme dhe që i kemi të gatshme”, ka thënë Lekë Kumnova, student në këtë fakultet.
“Është më ndryshe kur ne i shohim ato drejtpërdrejt se sa t’i shohim përmes literaturave”, ka shtuar studentja Aulona Belegu.
Ekipi i KOHËS ka kërkuar nga autoritetet e Fakultetit që ta shohë pajisjen, por këtë nuk e bënë të mundur, nën arsyetimin se nuk e kanë çelësin e magazinës ku ajo ndodhej. Tre profesorë thanë se çelësi ndodhet te sekretari i Fakultetit, e sekretari e tha të kundërtën.
Profesori i Mjekësisë së Veterinarisë, Fatgzim Latifi, i cili është përgjegjës për aparaturën, tha se ajo është në gjendje të mirë, mirëpo nuk është kompetent për të dhënë leje për ta vizituar.
“Ne jemi kujdesur me menaxhmentin, pasi nuk është faji i menaxhmentit që nuk është funksionalizuar objekti, pasi nuk varet nga fakulteti, por nga instancat tjera. Është izoluar mirë dhe është ruajtur mirë aparatura”, ka deklaruar Latifi.
Objekti i ri i Fakultetit nuk është funksionalizuar për shkak se ndodhet afër një largpërçuesi të tensionit të lartë. Kushtet teknike të lëshuara nga KOSTT-i për distancën prej së paku 7 metrash nga largpërçuesi nuk u respektuan kur filloi të ndërtohej objekti. Shkaku i kësaj, në fillim të muajit tetor studentët dhe stafi mbajtën grevë njëjavore.
