Një ngjarje tragjike ka ndodhur të dielën në Liqenin e Ujmanit, ku dyshohet se një 33-vjeçar, Rrahim Latifi, mërgimtar, është hedhur nga një lartësi prej 20 metrash në ujë.
Pavarësisht përpjekjeve të shumta të ekipeve të kërkim-shpëtimit, trupi i tij ende nuk është gjetur, edhe pse kanë kaluar mbi 24 orë nga raportimi i rastit.
Lidhur me ngjarjen ka reaguar zëvendësdrejtori i Policisë për rajonin e veriut, Veton Elshani, i cili ka bërë një apel të fuqishëm për qytetarët dhe mërgimtarët që frekuentojnë zonën, që të mos hidhen nga ura në Ujman.
“Qytetarët dhe mërgimtarët të cilët vijnë këtu, mos ta shohin këtë urë si distancë të vogël, lartësi të vogël që mos me u hudh nga ky vend. Nga ky vend janë hudhur profesionistët e ata i kanë parë në televizion, e për këtë arsye e marrin guximin mos u hudh. Duhet me pasë kujdes, sepse tash na ka mbetur të shpresojmë me e gjetë vetëm trupin,” tha Elshani.
Ai theksoi se dhimbja për familjen është shumë e madhe dhe institucionet janë në përpjekje të vazhdueshme për të zbuluar fatin e 33-vjeçarit.
Po ashtu, Elshani ngriti shqetësimin për mungesën e sinjalistikës në atë pjesë të liqenit, duke kërkuar që të ndërmerren masa parandaluese.
“Do të bisedojmë me Ibër Lepencin, për të parë nëse është kompetencë e tyre apo e Komunës vendosja e sinjalistikës. Besoj se Ibër Lepenci do ta kryejë këtë punë. Sinjalistika mund të jetë aty, por nëse qytetarët vendosen të hidhen aty, ata do të hidhen. Pra, duhet të ekzistojë një vetëdijësim,” shtoi ai.
Operacioni i kërkimit po vazhdon me intensitet, ndërsa autoritetet u bëjnë thirrje qytetarëve për kujdes maksimal dhe shmangie të veprimeve të rrezikshme në këtë zonë.
