Mjekët shqiptarë të cilët punojnë në vendet evropiane janë të gatshëm të ndihmojnë kolegët e tyre në Kosovë, dhe sistemin shëndetësor.
Ky ishte konkludimi i një ngjarje shkencore e cila i bëri bashkë mjekët shqiptarë nga e gjithë Evropa, por edhe nga Kosova, Shqipëria, Maqedonia Veriore e Lugina e Preshevës, shkruan Gazeta Shneta.
Gazeta Shneta ka përcjellë nga afër Kongresin e Parë Interdisiplinar në Munih të Gjermanisë, i cili është organizuar nga Shoqata e Mjekëve Shqiptarë në Gjermani dhe Lidhja e Mjekëve Shqiptar në Zvicër.
Kryetarja e Shoqatës së Mjekëve Shqiptar në Gjermani Dr. Marsela Ceno, ka thënë se motivi kryesor i kësaj ngjarje ka qenë bërja bashkë e mjekëve shqiptarë, vendosja e kontakteve dhe diskutimet për të ndihmuar kolegët nga trojet shqiptare.
“Të krijohet një platformë e mjekëve shqiptarë, ndoshta edhe ligjore, ku do të mund të ndihmonim dhe të kontribuonim për të ndihmuar vendet tona, qoftë duke shkuar atje për të mbajtur trajnime, apo për të sjellë kolegë tanë këtu për t’ua mundësuar avancimin. Qëllimi është që fillimisht të krijojmë kontaktet tona si shoqata dhe oda të mjekëve, e më pas të diskutojmë edhe për kërkesat ndaj institucioneve. Ne si mjekë shqiptarë në Gjermani jemi të gatshëm për të gjitha format e bashkëpunimit”, ka deklaruar specialistja e kirurgjisë, Dr. Ceno.
Nënkryetari i Lidhjes së Mjekëve Shqiptar në Zvicër, gastroenterologu Dr. Mentor Bilalli, ka thënë se mjekët në Zvicër janë të gatshëm të kontribuojnë në vendlindjen e tyre.
“Mendoj se ky është hapi i parë drejt thellimit të bashkëpunimit. Duhet së pari të vendosim kontakte e më pas sigurisht të shtojmë bashkëpunimin për të ndihmuar vendet tona. Për momentin jemi rreth 400 mjekë në Zvicër. Me lidhjen që kemi formuar para disa viteve, dhe është kënaqësi të shohim kolegë tanë që janë të gatshëm të kontribuojnë. Për neve është e dhimbshme kur po shohim ikjen e mjekëve nga Kosova. Situata është alarmante dhe duhet të mendohet pas shumë viteve. Sigurisht se duhet bashkëpunim me mjekët shqiptarë nga diaspora. Ata gjithmonë kanë qenë të gatshëm që të ndihmojnë”, ka deklaruar Bilalli.
Ndërkaq Ardian Mustafai, poashtu internist/kardiolog në Gjermani ka thënë se këto takime do të jenë më të shpeshta tash e tutje.
“Vet fakti i themelimit të këtyre shoqatave, është që mjekët nga të gjitha trojet shqiptare që të jenë të bashkuar dhe të rezultojë në një ndihmë për vendet tona. Ne nuk do të ndalemi me kaq dhe do të kemi takime më të shpeshta”, ka deklaruar Mustafai. /Gazeta Shneta/
