Ministrja e Ekonomisë, Artane Rizvanolli, ka thënë se vitin e kaluar ka pasur 18 milionë euro që janë ndarë për subvencionim të energjisë elektrike.
Ajo ka thënë se gjatë këtij viti nuk do të ketë një subvencionim të tillë.
Sipas saj, çmimet nuk janë aq të larta siç kanë qenë gjatë vitit 2021-22.
“Konsiderojmë që të këtë vit, nëse gjithçka shkon në rregull nuk do të kemi nevojë të ndajmë mjete shtesë për subvencionim”, ka thënë ajo.
Ministrja Rizvanolli, ka deklaruar se nga dhjetori i vitit të kaluar, serbëve në komunat veriore nuk iu është paguar shpenzimi i energjisë elektrike nga buxheti i Qeverisë së Kosovës.
Ajo tha se ndarja e fundit e buxhetit për energjinë elektrike është bërë në dhjetorin e vitit të kaluar, ndërsa, tash që serbëve iu duhet ta paguajnë borxhin e ardhshëm, ministrja u shpreh se “nuk presin të ketë rezistencë”.
“Një aspekt shumë pozitiv në gjithë këtë, nëse ka një aspekt pozitiv në këtë çështje është se qytetarët e Republikës së Kosovës edhe në atë pjesë në veri, pavarësisht përkatësisë etnike, e kuptojnë e edhe e pranojnë se energjia elektrike e konsumuar duhet të paguhet. Në këtë kuptim, nuk presim të ketë rezistencë, sigurisht që nuk do të jetë e dëshirueshme të paguajnë për një shërbim që s’e kanë paguar më herët, por s’presim rezistencë serioze”, ka deklaruar Rizvanolli.
Sipas ministres së Ekonomisë, institucionet e Kosovës janë në komunikim me Bashkimin Evropian për të përkrahur në pagimin e borxheve paraprake të energjisë elektrike në veri, e siç ka thënë ajo, borxhi është 18 milionë euro.
“Prej 1 viti, prej faturës së nëntorit të 2022-s, ne s’kemi ndarë mjete të reja, e kemi insistuar që kjo çështje të zgjidhet ashtu si të zgjidhet, e për borxhet kemi pasur komunikime dhe po kërkojmë nga BE-ja meqë BE-ja luan rolin e garantuesit të marrëveshjes. Duke qenë se i kemi zbatuar obligimet e pala tjetër jo, kemi kërkuar përkrahjen e BE-së për të paguar borxhet që janë akumuluar nga ana e konsumit”, është shprehur Rizvanolli.
Ajo ka thënë se kontrata e nënshkruar mes KEDS-it dhe Elektroseverit “në përpikëri i zbaton dhe respekton ligjin dhe rregullivat e Qeverisë së Kosovës”/koha
