Ministrja e Arsimit, e Shkencës, e Teknologjisë dhe e Inovacionit, Arbërie Nagavci, është takuar gjatë ditës me presidentin e EQAR-it, Karl Dittrich, dhe drejtorin e EQAR-it, Colin Tück.
Pas takimit, ministrja ka thënë se Qeveria e Republikës së Kosovës ka bërë hapa të mëdhenj për kthimin e Kosovës në Asociacionin Evropian të Sigurimit të Cilësisë në Arsimin e Lartë (ENQA) dhe Regjistrin Evropian për Sigurimin e Cilësisë në Arsimin e Lartë (EQAR), për çka edhe është përgëzuar nga përfaqësuesit e EQAR-it, të cilët gjatë vizitës në Kosovë janë takuar me aktorë të rëndësishëm të arsimit të lartë.
Ministrja Nagavci, me këtë rast, ka theksuar se MAShTI ka garantuar pavarësi të plotë institucionale dhe ka dorëzuar në Kuvend Ligjin për Agjencinë Kosovare të Akreditimit, ku janë marrë parasysh mendimet e të gjithë hisedarëve, është siguruar buxheti i mjaftueshëm dhe objekti modern për AKA, si dhe janë hequr të gjitha pengesat për zhvillimin e kësaj Agjencie.
Nagavci, po ashtu, ka thënë se rikthimi i AKA në ENQA dhe EQAR është i rëndësishëm, sepse garanton mobilitetin e studentëve si një nga parimet fundamentale të sistemit të Bolonjës, por edhe vazhdimin e studimeve jashtë vendit.
Ajo ka falenderuar përfaqësuesit e EQAR-it për vizitën, mbështetjen e ofruar, komentet në lidhje me Ligjin për AKA dhe vlerësimin e punës që është bërë nga institucionet e Kosovës në këtë drejtim.
Presidenti i EQAR-it, Karl Dittrich, ka përgëzuar Qeverinë e Kosovës për veprimet që ka ndërmarrë në përmbushjen e kritereve për rikthimin e Kosovës në ENQA dhe EQAR. Dittrich tha se Kosova ka bërë një progres enorm dhe kjo nuk është e rëndësishme vetëm për arsimin e lartë, por edhe për të ardhmen e vendit pasi Kosova ka një popullsi me moshë të re.