Në ceremoninë e organizuar për ndarjen e certifikatave të suksesit nxënësve fituesve të garës “Kangaroo” mori pjesë edhe ministrja e Arsimit, e Shkencës, e Teknologjisë dhe Inovacionit, Arbërie Nagavci, e cila ka mbajtur një fjalë rasti.
Ministrja Nagavci gjatë fjalimit të saj, pasi ka uruar fituesit e garës, ka theksuar se nxënësit me inteligjencë të jashtëzakonshme, dhunti e talente janë ndër asetet më të çmuara dhe më me vlerë shtetërore.
Ajo ka vlerësuar se garat e këtij formati janë në të njëjtën kohë edhe mënyra më e mirë për identifikimin e talenteve të fushave të ndryshme edhe motivuese e nxitëse që nxënësit me këto talente të investojnë në talentin e tyre dhe ta shpërfaqin atë, sidomos nëse më të mirët dhe më të suksesshmit e këtyre garave shpërblehen, përkrahen dhe mbështeten në forma të ndryshme dhe të përshtatshme.
Ministrja Nagavci ka theksuar përkushtimin e Ministrisë së Arsimit për të mbështetur institucionet arsimore, OJQ-të profesionale dhe entitet e ndryshme që merren me identifikimin dhe përkrahjen e nxënësve me aftësi të jashtëzakonshme.
Ajo ka bërë të ditur se MAShTI tashmë për çdo vit subvencionon organizatat e specializuara që merren me trajtimin e këtyre fëmijëve, pasi një talent në çfarëdo disipline, do të zhvillohet plotësisht vetëm nëse mbështetet në formën më të mirë të mundshme.
Instituti ATOMI ka organizuar Garën Ndërkombëtare të Matematikës Kangaroo në Kosovë (MKC-K), në të cilin kanë marrë pjesë mbi 2500 nxënës të klasëve të ndryshme nga tërë vendi.
Earta Kasumi ishte fituesja e vendit të parë në nivel vendi në të gjitha kategoritë në Garën Kangaroo 2022, Dina Maliqi zuri vendin e dytë, ndërsa Alba Pllana doli në vendin e tretë.
Gara Kangaroo është gara më e popullarizuar në botë për fushën e matematikës, e cila organizohet në mbi 70 vende të botës dhe çdo vit marrin pjesë mbi 6 milionë nxënës nga mbarë bota./kosovanews/
