Në mbledhjen e sotme të Qeverisë së Republikës së Kosovës, u miratua themelimi i Parkut Industrial të Përgjithshëm, në Komunën e Drenasit.
Kështu bëri të ditur, Ministrja e Industrisë, Ndërmarrësisë dhe Tregtisë, Rozeta Hajdari. Ajo tha se themelimi i këtij parku është inicuar dhe propozuar nga Ministria e Industrisë, Ndërmarrësisë dhe Tregtisë, përmes Agjencisë për Investime dhe Përkrahjen e Ndërmarrjeve në Kosovë ( KIESA).
Ky park do të ndërtohet në kilometrin e 22-të përgjatë magjistrales Prishtinë – Pejë, në fshatin Korreticë e Epërme, përballë Parkut ekzistues të Biznesit në Drenas.
Hajdari tha se parku i Përgjithshëm do të ketë një sipërfaqe prej 36.50 hektarësh në pronësi të Qeverisë së Republikës së Kosovës, dhe do të akomodojë bizneset me veprimtari prodhuese dhe përpunuese.
Ky Park Industrial ka për qëllim:
Nxitjen dhe mbështetjen e investimeve të qëndrueshme, me veprimtari prodhuese dhe përpunuese, të cilët do të operojnë në formën e një ekosistemi inovativ
Punësimin dhe aftësimin e fuqisë punëtore
Nxitjen e veprimtarive që i kontribuojnë ekonomisë qarkore
Rritjen e konkurrueshmërisë dhe mbështetjen e eksportit dhe
Nxitjen dhe transferimin e teknologjisë së avancuar.
Për dallim nga parqet ekzistuese, ky i fundit do të ketë një ambient me karakteristika miqesore për mjedisin, qasje të lehtë në rrugë, energji, ujë, ndriçim dhe kanalizim.
‘’Themelimi i këtij Parku Industrial të Përgjithshëm është i bazuar në Ligjin Nr.08/L-208 për Parqet Industriale dhe Teknologjike dhe Udhëzimeve Administrative përkatëse, mbi të cilën bazë ligjore, Agjencia KIESA ka inicuar procedurat e aplikimit për krijimin e Parkut, në pronësi të Qeverisë së Republikës së Kosovës dhe ka marrë të gjitha lejet dhe pëlqimet e nevojshme, përfshirë studimin e fizibilitetit dhe projektin kryesor për propozim të themelimit të këtij Parku Industrial të Përgjithshëm në Drenas’’, shkroi ministrja Hajdari.
