Mbrëmë Kosovanews raportoi ekskluzivisht se Policia e Turqisë këtë të martë e ka ndaluar dhe arrestuar në Aeroportin e Stambollit stilistin e njohur kosovar, Valdrin Sahiti.
Arrestimi i Sahitit ka ndodhur pasiqë ai është i dyshuar për veprën penale blerja, pranimi, posedimi i drogave dhe stimuluesve për përdorim bazuar në nenin 191 të kodit penal të Turqisë.
Lidhur me këtë, KosovaNews ka kontaktuar Ministrinë e Punëve të Jashtme dhe Diasporës, nga ku kanë thënë se janë në pritje të informacioneve zyrtare nga ana e autoriteteve turke.
“Ju njoftojmë se Ministria e Punëve të Jashtme dhe Diasporës(MPJD), është ende në pritje të informacioneve zyrtare nga autoritetet turke, rreth rastit në fjalë”, thuhet në përgjigjen e MPJ-së.
Po ashtu në përgjigjen e MPJ-së thuhet se meqenëse deri në këto momente nuk posedojnë asnjë konfirmim zyrtar rreth rastit, nuk mund të flasin për masat që duhen marrë në të tilla raste.
“Meqenëse deri në këto momente MPJD nuk ka asnjë konfirmim zyrtar rreth rastit, ne nuk mund të flasim për masat që duhen marrë në të tilla raste ngase varet nga informacionet zyrtare që do t’i pranojmë gjatë ditës”, thuhet në përgjigjen e MPJD-së.
Kujtojmë se Valdrin Sahiti ishte paisur me pasaportë diplomatike në vitin 2020 me rekomandim të ish ministres së jashtme të Kosovës Melisa Haradinaj. Paisja e tij me pasaportë diplomatike ishte bërë nën arsyetimin për afirmimin e Kosovës në arenën ndërkombëtare si dizejnator mode. KosovaNews
