Ministria e Mbrojtjes e Republikës së Kosovës përmes një reagimi ka demantuar përmbajtjen e një lajmi të publikuar në portalin “Gazeta Metro”, duke e quajtur atë lajm të rrejshëm e tendencioz kundër Ushtrisë së Kosovës – FSK.
Në reagimin e Ministrisë thuhet se gjatë ditës së sotme një lajm i botuar në portalin “Gazeta Metro” është i pavërtetë, tendencioz, i njëanshëm dhe mbi të gjitha i dëmshëm me titull “Pjesëtari i FSK-së i del kundër shtetit të Kosovës, përkrah masakrën e terroristëve të Hamasit ku ishin 40 foshnje”.
“Njoftojmë mediat dhe qytetarët se emri i lakuar i qytetarit në portalin METRO, nuk ka të bëj fare me FSK-në… Prandaj nuk e kemi të qartë motivin e gazetës për të shpifur, keq informuar dhe për të njollosur emrin e Ushtrisë së Kosovës, uniformën, stemën e Ushtrisë dhe Flamurin e shtetit tonë, të publikuara në foto si ilustrim i lajmit në artikullin e lartpërmendur”, thuhet mes tjerash në reagimin e Ministrisë së Mbrojtjes, e cila ka dhënë edhe fakte në përgënjeshtrimin e lajmin të Gazetës Metro.
Reagimi i plotë dhe pa ndërhyrje i Ministrisë së Mbrojtjes së Republikës së Kosovës:
Gazeta METRO publikon lajm të rremë për FSK-në rreth reagimeve për luftën Izrael – Palestinë
Njoftojmë qytetarët dhe mediat se sot (11.10.2023) në portalin “Gazeta Metro” është botuar një lajm i pavërtetë, tendencioz, i njëanshëm dhe mbi të gjitha i dëmshëm me titull “Pjesëtari i FSK-së i del kundër shtetit të Kosovës, përkrah masakrën e terroristëve të Hamasit ku ishin 40 foshnje”.
Gazeta nuk mjaftohet që shpif me titullin e pavërtetë, por për më tepër shpifjen e thellon edhe me tej kur bën “thellimin” e lajmit se: “Një pjesëtar i Forcës së Sigurisë së Kosovës (FSK), ka komentuar në lajmin ku në Izrael dje u vranë të paktën 40 foshnje, duke shprehur respekt për Hamasin, që sipas tij kanë qenë profesionalist në këtë masakër, shkruan Gazeta Metro”.
Njoftojmë mediat dhe qytetarët se emri i lakuar i qytetarit Hajzer Shyti, në portalin METRO, nuk ka të bëj fare me FSK-në, i apostrofuari është demobilizuar prej FSK-së para 5 (pesë) viteve.
Prandaj nuk e kemi të qartë motivin e gazetës për të shpifur, keq informuar dhe për të njollosur emrin e ushtrisë së Kosovës, uniformën, stemën e ushtrisë dhe flamurin e shtetit tonë, të publikuara në foto si ilustrim i lajmit në artikullin e lartpërmendur.
Lusim mediat që çdoherë, e aq më tepër në rrethana të jashtëzakonshme të verifikojnë lajmet e rreme që kanë të bëjnë me imazhin e ushtrisë e të shtetit.