Ministria Mjedisit, Planifikimit Hapësinor dhe Infrastrukturës ka angazhuar një laborator për sigurimin e cilësisë për mirëmbajtjen dhe vendosjen e sinjalizimeve nëpër rrugët e Kosovës.
Ministria Mjedisit, Planifikimit Hapësinor dhe Infrastrukturës, për sigurimin e cilësisë së materialeve në punët e realizuara për mirëmbajtjen dhe vendosjen e sinjalizimeve nëpër rrugë Nacionale, Rajonale dhe në Autoudhë përmes aktivitetit të prokurimit ka angazhuar një Operator Ekonomik, i cili do të bëjë ekzaminime kontrolluese në teren dhe në laborator për kontratat e ndërtimit, rikonstrukturimit, rehabilitimit dhe mirëmbajtjes së rrugëve dhe objekteve përcjellëse (strukturave) në kontratat e lidhura nga Ministria.
Sipas kontratës së emërtuar “Ekzaminimet kontrrolluese për material dhe kualitetin e punëve në projektet e sinjalizimeve të infrasktrukturës rrugore” ekzaminimet kontrolluese të materialeve dhe punimeve do të kryhen sipas Standardeve Evropiane si dhe standardeve tjera ndërkombëtarisht të pranuara, raporton KosovaNews.
Dokumentet tregojnë se ekzaminimet që do të bëhen sipas paramasës së kësaj kontrate e që janë pjesë e specifikimeve teknike, janë:
Matja e intensitetit të retro-refleksionit të shenjave horizontale në rrugë, matja e dukshmërisë ditore QD dhe natën RL në kushte të thata – EN 1436;
Matja e intensitetit të retro-refleksionit të shenjave horizontale në rrugë, matja e dukshmërisë natën në kushtet në lagështi Rw – EN 1436: 2007 + A1.2008;
Matja e koordinatave të ngjyrave kromatikës (x,y) dhe faktorit ndriçues beta (β) të shenjave rrugore në rrugë;
Matja e koeficinetit të retrorefleksionit të shenjave vertikale të komunikacionit RA – EN 12899-1;
Matja e kromatitetit pranë ndriçimit ditor dhe faktori ndriçues të shenjave të komunikacionit CR – EN 12899-1;
Matja e trashësisë së shenjave horizontale
Për verifikimin e cilësisë së materialeve të përdorura dhe kontrollimin e kualitetit të punimeve që do të ekzaminohen në teren dhe laborator përpos ekzaminimeve kontrolluese, do të bëhen edhe ekzaminime vijuese të nevojshme nga kontraktuesi për të dëshmuar cilësinë e materialeve të përdorura në kualitetin e punëve të kryera.
Kontrata mes Ministrisë dhe Operatorit Ekonomik fitues është nënshkruar më 13.07.2022, dhe kohëzgjatja e kontratës është për 36 muaj.
Sipas kontratës laboratori duhet të hartoj raportin e Testimit-Ekzaminimit në të cilin do të përfshihen, numri i raportit; data e ekzaminimit; vendi-lokacioni; numri i kontratës; kryesi i punimeve.
Raporti duhet të dorëzohet tek menaxheri i kontratës për ekzaminime kontrolluese, tek menaxheri i kontratës për vendosjen e sinjalizimeve si dhe dy kopje i mbanë laboratori./KosovaNews/
